Mumbai an chak ve ta

Indian Premier League-ah record nei ṭha ber Mumbai Indians-in chak hmel an hmu ta a, Inrinni zan khan Rajasthan Royals chu wicket ngain an hneh. Inkhel dangah Lucknow Super Giants leh Gujarat Titans ten Punjab Kings leh Royal Challengers Bangalore te an hneh bawk.

Dr. DY Patil Sports Academy, Navi Mumbai-ah Mumbai-in vawm hmasak an thlang. Rajasthan Royals-in Jos Buttler-a'n 67 runs siam mah se over 20-ah 158/6 runs an siam. Mumbai tan captain Rohit Sharma-a'n 2 runs chauh siam mah se Suryakumar Yadav (51), Tilak Varma (35) leh Ishan Kishan (26) te hmangin over 19.2-ah 161/5 runs siamin hnehna an chang.

Mumbai hian hnehna chang mah se match hmasa pariatah an tlawm vek avangin playoff luh beiseina an nei tawh lo. Zanin dar 7:30 hian Kolkata Knight Riders leh Rajasthan Royals te an inkhel leh ang.