Napoli an chak chiang

Tun hnaia che fuh hleithei lo Napoli chuan chak ni hmel an hmu leh ta. Naples club hian Inrinni zan khan Sassuolo chu 6-1 teh meuh in an sawp a, Serie A-ah pathumna ni turin an dinhmun a siamṭha leh ta.

Dries Mertens-a'n goal hnih a khung bakah, defender Kalidou Koulibaly, Victor Osimhen, Hirving Lozano leh Amir Rrahmani ten goal khat ṭheuh an khung a, mikhual tana Maxime Lopez goal khungin awmzia a nei phak lo.

Napoli hian Milan club pahnih Inter Milan leh AC Milan chu Serie A nomawi an inchuh pui a, mahse an tun hnaiah vawi hnih an chak loh bakah an khingpui nena inhnehtawk vawi khat an nei a, an tan champion beiseina a thamral.