Football agent Raiola a thi

Footballer langsar ṭhahnem takte buaipuitu football agent Mino Raiola chu kum 54 mi niin chuap natna avangin a thi. Italian agent hi Ningani khan khawthlang media-te chuan a thih thu an tarlang a, Raiola 'twitter account' kaltlangin a la thih loh thu tarlan ni leh mah se Inrinni khan a thih thu hi nemngheh a ni.

Raiola chhungte chuan, "Football agent, ngilneihna ngah leh danglamin min kalsan hi kan tuar takzet. Mino hian player-te hma khua ngaihtuaha theihtawp a chhuah ṭhin ang bawkin a thih dawnah theihtawp a chhuah.

"Mino hian a hnathawh hmangin mi ṭhahnem takte nun phung a thlak danglam a, football chanchinah bung thar a ziak. Player-te dinhmun chawi sang chu a thil tum a ni a, hei hi chhunzawm zel a ni ang.

"Hun harsa kan tawh laia min thlawptu zawng zawng chungah lawmthu kan sawi a, chutihrualin a chhungte leh ṭhiante zalenna min ngaih pawimawhsak turin kan ngen," tiin thuchhuah an siam.

Raiola hnuaiah hian player langsar Ering Haaland, Zlatan Ibrahimovic, Paul Pogba, Gianluigi Donnarumma, Romelu Lukaku, Matthijs de Ligt, Lorenzo Insigne, Donyell Malen leh Jesse Lingard te an awm. Amah hi football agent lian leh an hnuaia player-te awm khawmna Football Forum-ah president a ni bawk.

Italian agent tel loin tun nipui bazar hman a ni dawn a, transfer thuthang lian zingah Erling Haaland leh Paul Pogba te an tel. Raiola tel loa Haaland leh Pogba ten club thar an zawng tur hian ngaihven a hlawh zui ang.

Raiola hi November 4, 1967 khan Nocera Inferiore, Italy-ah a piang a, a chhungte nen Dutch khawpui pakhat Haarlem-ah an pem. A pa hian restaurant a nei a, hetah hian waiter hna a thawk ṭhin.

Hnathawk chung hian high school diploma a zo a, University-ah pawh kum hnih a kal. Raiola hi HFC Haarlem youth team tan a khel ṭhin a, kum 18 a nihin inkhelh chawlhsanin youth team hotupa a ni ta zawk.

Raiola hi football a kalsan lo a, football agent a ni zui. Mi bik a ni tih nemnghettu chu ṭawng pasarih Italian, English, German, Spanish, French, Portuguese leh Dutch zet a thiam.

Agent company 'Sports Promotions' tana a thawh laiin transfer lian tak tak a kalpui a, chung zingah chuan Dennis Bergkamp-a'n Inter Milan a zawm pawh a tel. Amaha a kal hran hnuah Euro 96-a Czech star Pavel Nedved chu Sparta Prague aṭangin Lazio-ah a kaltir bawk.

Transfer langsar
Raiola hi agent zingah pawh sum siam thiam langsar a ni a, khawvel player manto ber ni tura Paul Pogba-a'n Juventus aṭanga euro maktaduai 105-a Manchester United a zawm khan euro maktaduai 25 zet a ei niin sawi a ni.

Romelu Lukaku-a'n kum 2017 khan Everton aṭangin Manchester United chu pound maktaduai 75-in an zawm a, hemi ṭuma Belgian striker agent chu Raiola hi a ni. April 2018 khan Raiola leh Lukaku te hi an inṭhen a, Belgian striker hi Federico Pastorello hnuaiah a awm.

Kum 2019 khan Raiola buaipuiin Matthijs de Ligt chuan pound maktaduai 67.5-in Ajax aṭangin Juventus a zawm bawk. De Ligt hian Juve a zawm hma hian Ajax chu Champions League semifinal a thlenpui a, Europe-a kum 21 hnuai lam player ṭha ber hnena hlan ṭhin 'Golden Boy award' chawimawina pek a ni bawk.