Third round-ah Halep a lut

Madrid Open khelh laiah Simona Halep chuan world number 2 Paula Badosa chu 6-3, 6-1 in a hneh a, harsa vak loin third round a inhlangkai. Inkhel dangah Ons Jabeur pawhin Varvara Gracheva chu 7-5, 0-6 6-4 in a hneh ve bawk.

Romanian star Halep hian hliam vangin ni kum aṭang khan match a khel tam lo, tun ṭumah pawh hian seeded a ni phak lo. Mahse, player ṭha a nihna a la hre reng a, a inkhelh thiamna clay court a nih bawk avangin champion tura rinkai a ni phak.

Grand Slam vawi hnih champion tawh Halep chuan, "Tun hma pawhin he hmunah hian result ṭha ka lo nei tawh ṭhin, tunah pawh a tir aṭangin nuamti takin ka khel thei, boruak nuam tak hnuaia inkhelh chu a nuam takzet," a ti.

Halep hian tun hnai khan coach atan Patrick Mouratoglou a ruai. Mouratoglou hi Grand Slam vawi 23 champion tawh Serena Williams nena lo thawkdun reng tawh kha a ni a, a hliam dan hnua beisei a neih san leh lai tak a ni ang.

Inkhel dangah Grand Slam title pahnih nei tawh Victoria Azarenka pawh a chak. Darkar hnih leh minute 20 chhungin a khingpui Tamara Zidansek chu 3-6, 6-1, 6-3 in a hneh. Amanda Anisimova pawhin 3-6, 6-3, 6-2 in Petra Martic a hneh bawk.