Bayern coach Nagelsmann a lawm lo

German champion an nih hnua an match hmasa berah Bayern Munich an chak lo. Inrinni zan Bundesliga inkhelah Bavarians hi Mainz mualah 3-1 in an tlawm a, manager Julian Nagelsmann a lawm lo.

Bayern hian kar hmasa mai khan a zawna a vawi 10 nan Bundesliga title an la, khualmualah hian an tlarhnung a phui lo. Mainz hian Jonathan Burkardt, Moussa Niakhate leh Barreiro Martins te hmangin goal an khung.

Chak lo mah se Robert Lewandowski erawhin goal khung a bansan chuang lo, an goal khat neih chhun hi a khung a ni. Poland international hian Bundesliga season kal laiah goal 34 a khung tawh, khelh hmabak pahnih an la nei.

Bayern coach Nagelsmann chuan, "Inkhela hnehna chang tur chuan inpekna thuk tak neih a ngai, tun ṭumah khan chutiang chu kan nei lo. Champion mah ila chak loh kan ngah, kan chak lohna match hi a tam mah mah," a ti. Tun season-ah vawi nga an tlawm tawh.

Borussia Dortmund pawh an chak lo. Erling Haaland-a'n hattrick siamin ropui viau mah se, an mikhual VfL Bochum 1848 lakah 4-3 in an tlawm, inkhel result hian table chunglam dinhmun a ti danglam thei tawh chuang lo.