Point thum inbeisei Aizawl FC
Vawiin tlai dar 1:30 hian RG Stadium, Mualpuiah Aizawl FC leh Minerva Punjab te an inhmachhawn dawn a, kum 2017-a Mizoram chhunga I League match hmasa berah hian MPL club AFC hi chak zawk tura rinkai an ni.
Aizawl FC hian tun season I League match hmasa berah champion tuma inthuam ṭha East Bengal khelmualah point khat an hlawh chhuak a, Minerva Punjab FC hi anmahni ang bawka vawi khat khelhna Chennai City FC nen goal awm loin an inhnehtawk ve bawk.
En man tlahniam
Mizoten I League an hlut tih chu RG Stadium-a Bengaluru FC rawn inkhelh ṭum khan a chiang a, Mualpuiah mipui ṭhahnem tak an pungkhawm. Tun season pawh hian kan khawtualah India ram pum huap inelna vawi kua en tur a awm dawn a, Aizawl FC thuneitute chuan Mizo football ngainatute chu Mizo club awm chhun ṭawiawm turin an ngen.
Aizawl FC hotuten season hnihnaah an tawnhriat hmang ṭangkaiin mipui milin ticket an siam a, gallery chung ṭha lai aṭanga en duh tan pawh Rs 200 chauh sen a ngai tawh a, a hnuai lam Rs 100 a ni ang.
MPL club AFC leh Minerva Punjab inkhel turah ticket lei tur a la a awm a, Mizo club a hmun ngei a ṭawiawm duh tan stadium bul hnaiah ticket lei mai tur a awm dawn bawk. Stadium-a inkhel en hman lo tur tan erawh Ten 2-ah live telecast a ni ang.
Miriam-i tan
Season liam ta khan Aizawl FC chuan pa ei sual avanga chhungte chan Miriam-i ṭanpui nan Stand an siam. Hemi aṭanga sum lut zawng zawng Rs 5,2000 chu vawiin inkhel halftime lai hian Miriam-i hnenah AFC chuan a hlan ang.
Anni leh Keini
Aizawl FC hi 2005 I League Second Division champion an ni a, season liam ta khan a vawi khat nan India rama club football inelna sang ber an khel a, season tawpah tawnhriat neih tam tawk lohna a lang.
Nikum season khan AFC hnuaiah DSK Shivajians chiah an awm a, tun season-ah erawh result ṭha zawk beiseiin I League-a tawnhriat ngah ber zinga mi coach Khalid Jamil an lalut. AFC hotute an puih ṭhat bawk avangin Mumbai FC coach hlui hian Mizo club-a khel turin player ṭha a senglut a, hei hi Kolkata-a East Bengal an draw theihna chhan a ni.
Minerva Punjab hi season liam taa I League Second Division-a pahnihna an ni thung a, head coach Surinder Singh hian I League-ah tawnhriat a nei lo.
Punjab club hian season liam taa an player pawimawh chelh theih loh an nei nual a, chung zingah chuan an top scorer Nigerian forward Kareem Omolaja bakah India international hlui Clifford Miranda te an tel. Goan midfielder Miranda hian an khaw club Churchill Brothers-a khelh a thlang zawk.
Surinder-a naute zingah player beiseiawm tak tak an tam a, amaherawhchu I League hi kum bithliah inelna a nih loh avangin hna hautak an la hmachhawn dawn.
Chutihrualin Minerva Punjab hian season liam taa Aizawl FC top scorer Joel Sunday, Nigerian defender chak ṭha Loveday Eyinnaya, Nepal league top scorer Victor Amobi leh India international hlui Manandeep Singh te an kawl avangin zuam ngawt chi erawh an ni lo ang.
Beisei sang Punjab
Minerva Punjab coach Surinder Singh chuan, "Season tawpa pathumna nih hi kan tum chu a ni. Kan tum a san hian kan theihna tak tak a lang chhuak thei chauh a, tumna a san chuan tlakna a sang tih hi kan ngaihdan a ni," tiin Vanglaini palai a hrilh.
Surinder hian Aizawl FC coach Khalid Jamil chu coach ṭha tak a nih thu a sawi a, Mizo club pawh team ṭha tak ni mah se point thum hlawh chhuah tuma Mizoram an rawn pan thu a sawi tel bawk.
AFC ṭha zawk
Aizawl FC-in Chennaiyin forward Jayesh Rane loan hmanga an lalut thei hi Indian football hrechiang tan chuan thilmak a tling a, Mumbai tlangval hian I League season li leh ISL season thum a khel tawh. East Bengal lakah Rane hian a thiamna a pholang tawh a, Punjab club hmachhawn turin a dam ṭha bawk.
MPL club hian Mizo defender tawnhriat nei ṭha Zohmingliana Ralte an lalut thei bawk a, Ramhlun South tlangval leh Nigerian defender Eze Kingsley-te inkawp hi an zahpuiawm loh a, keeper beiseiawm Albino Gomes a awm bawk avangin nikum aiin kumin Aizawl FC tlarhnung a khawng ṭha zawk.
Aizawl FC forward Kamo Stephane Bayi erawh fak hluaina tur a awm lo a, Minerva Punjab nen a vawi khatna atana inlan tura ngaih Syrian midfielder Mahmoud Al Amna erawh chhuantham a ni. Sporting Goa midfielder hlui Amna hian jersey no. 6 a ha dawn a, Syria tana vawi 78 zet inlan tawh en tur ringawt hian RG Stadium pan tham a ni.
Khalid-a thukhawchang
Aizawl FC coach Khalid Jamil chuan, "Club lamin player min pek danah ka lawm a, kan squad hi an ṭha tawkin ka hria. Kei chuan muang changa hmasawn hi ka duh a, attacking game khel turin kan la inpeih lo a, khelh erawh kan la tum ang. Minerva Punjab lakah erawh result ṭha tak kan neih ngei ka beisei a ni," tiin point thum hmuh tuma an khelh tur thu a sawi.
AFC hian inhliam vangin Brandon VL Remdika an chhawr thei lo a, inhliam tharlam dang erawh an awm lo.