Messi hlawh vangin Barca an buai
Barcelona chief executive Oscar Grau chuan Catalan club ṭantute tana thu hriat nuam lo tak a sawi chhuak a, kum 2018-a Nou Camp-a a contract hmang zo tur Lionel Messi hnena contract thar zawrh tur chuan sponsorship leh player hralhna aṭanga an sum hmuh aṭanga an insiamrem a ṭul tur thu a sawi chhuak.
Oscar Grau chuan, "Khawvela player ṭha ber ber kawl chu kan duh ngei a, mah se chutianga kan tih hma chuan uluk taka ngaihtuahna sen a ṭul thung a ni," a ti a, kum khata pound maktaduai 21 ve ve hlawh tura Luis Suarez leh Neymar te kum 2021 thleng cham tura contract thar lo ziahpui tawhtu Barca-in suma an buai thu an pha lo.
La Liga-ah club-in an duh zat zat player tan hlawhah an seng ngawt thei lo a, kum khata player hlawha an insenna zat chuan an kum khat budget a 70% a pelh a thiang lo a ni. Kum 29-a upa Messi hian kum khatah pound maktaduai 19 bawr vel a hlawh mek nia tarlan a ni a, Suarez leh Neymar aia hlawh hnem a duh ngei a rinawm bawk.
Barca chief executive chuan, "Barca chuan khawvela player ṭha ber hi kan hnenah cham zel se kan duh a, club member leh min ṭantute lawm zawng tak pawh sawi ka chak. Mahse, chung zawng zawng hma chuan rilru fim tak pua ngaihtuahna kan sen phawt a ṭul a ni," tiin Messi dinhmun a derthawng ta hle.