MFA-in Germany-a football zir tur a thlah
Nimin khan I&PR Auditorium-ah Mizoram Football Association chuan Germany-a football zir tur Mizo rawlthar 17 leh coach Lalchhuanawma te thlahna hun a hmang a, MFA president Lal Thanzara chuan, "Theihtawp chhuahna leh tumruhna nen football history-ah in hming a lan ngei ka beisei a ni," tiin a fuih.
Germany-a football inzir tur hian U Dream leh Tata Trust-te
ṭangkawpin tun ṭumah hian North East aṭangin player 35 leh coach pahnih a tir dawn a, kum hnih kal ta khan batch hmasa ber tirh a ni tawh bawk. Mizoram aṭanga kal turte hian vawiinah Aizawl an chhuahsan ang a, January 16 khian Kolkata aṭangin Germany an pan ang.
Programme Kalphung
MFA honorary secretary Lalnghinglova Hmar chuan, "Mi hausa tawtaw Ronnie Screwvala group U Sports hnuaia U Dream hi a bul tumtu an ni a, anni hian football chawi nunna tur te, anmahni intihlar nan te, an hmasawn zel nan te - footballer engmaw zat chher chhuah an tum. Indian footballer-te hi khawvelah kan langsar ve thei ang tih an ring. Chumi atan chuan India rama talent nei ṭhate thlang chhuakin Germany-ah training ṭha pek chu an thutlukna a ni a, theihtawpin han inzir se footballer ṭha hi India ram aṭangin an chhuak ve thei ang tih rilru neiin Tata Trusts nen ṭangkawpin he programme hi an buatsaih a ni," tiin programme kalphung a sawi fiah.
Germany-a football zir tur thlahna hun kaihruaitu Tetea Hmar chuan naupangte chu sikul ṭhaa lut tur ang an ni a, tunah chuan engmah an la nih loh thu inzir tura bul an ṭan chauh thu a sawi a; bul ṭan tur nuna nung turin a chah.
NEIDA (Tata Trusts)-a Sr. program officer Dr James Lalthansanga chuan, "Germany-a football training nei turte tan hian Tata Trusts chuan an kalna leh awmna senso turte a tumsak dawn a, mi pakhat tan nuai thum vel zel a seng dawn a ni," tiin a sawi a, MFA thawhrimna chuan phurna nasa tak a pek thu a sawi lang bawk.
Tata Trusts lam tum bak sum leh pai hi U Dream-in an tum ang.
Fuihna
MFA president Lal Thanzara chuan, "Tihtak zetna rilru pu a, atchilh a, teirei peih a, khawhar ngai thei turin ka chah duh che u a ni. In awm tluan chuan football history-ah hian in hming a lan ngei ka beisei a ni," tiin Germany-a zin turte a fuih.
Thlahna huna khuallian home minister R. Lalzirliana chuan, "Training tur chauh in ni a, in ropui miah lo tih inhriat a ṭha. In training-naah ṭhahnemngai tak leh tumruhna nen in tih loh chuan rawih chhunzawm tlak in ni dawn lo a, eizawnna pawh in neih phah lo ang. Khawvel ram zau zawk hmuh ringawt kha an tirh chhan che u a ni lo a, eizawnna inhmuh theih bakah ram tihmingṭha tur in ni. Chuvangin in training chhung hian theihna zawng zawng i nchhuah tur a ni," tiin bul ṭan chauh an nih thu chiang takin a sawi.
MFA chief patron ni bawk R. Lalzirliana chuan football leh infiamnain hma a sawn theih nana hruaitu ṭha an awm chu lawmawm a tih thu a sawi lang bawk.
Germany-a inzir turte chu
# Hming Pa Hming Khua/Veng
1 Emmanuel Lalchhanchhuaha Zosangliana (L) Pehlawn
2 Lalchhanchhuaha Lianthangpuia Kawrtethawveng
3 Lalchungnunga Chhangte Laldinmawia Chhangte Zotuitlang, Lunglei
4 Lalhmingmawia Royte R. Lalpianfela Armed Veng South, Aizawl
5 Lalhriatpuia Lalramngaia Armed Veng South, Aizawl
6 Lalmalsawma Lalhmuchhuaka ITI Veng, Aizawl
7 Lalmuanzova Khawlhring Lalmuankima Durtlang, Aizawl
8 Lalramdinsanga Ralte R. Lalnunsanga Serkawn, Lunglei
9 Lalramhmachhuana Vanlalhruaia Kawrtethawveng
10 Lalramzailawma Lalramhmachhuana Ramhlun South, Aizawl
11 Lalremliana Thangkima Kawrtethawveng
12 Larry Lalrinawma Rosiamliana Dinthar Veng, Lengpui
13 Moody Lalawmpuia Lalropuia Vaivakawn, Aizawl
14 Moses Lalrinzuala Gospel Thangrimawia Khatla, Aizawl
15 R. Lalrinpuia R. Lalnunzira College Veng, Kolasib
16 Ramhlunchhunga Immanuela Electric Veng, Kolasib
17 Vanlalpeka Lalhmachhuana Model Veng, Lengpui
Coach Lalchhuanawma (LCh-a) Lalnuntluanga Dinthar Veng, Aizawl