Saints hmaah Reds an thianghlim zo lo

EFL Cup semifinal first leg chu nilaini zan khan St. Mary's-ah khelh a ni a, mualneitu Southampton hmaah 1-0 in Liverpool an tlawm. Saints tan Nathan Redmond chuan he inkhela goal awmchhun hi a khung a, January 25 zana Anfield-a team pahnih an inhmachhawn leh hunah an inringtawk sawt ang.

Nathan Redmond hian inkhel ṭan aṭanga minute 20 lekah Jay Rodriguez siam sak chu a khung nghal a, sawisel hlawh goalkeeper Loris Karius chu Liverpool-in EFL Cup-a beisei an la neih ngam chhan a ni - German keeper hian goal khungtu Redmond-a hun ṭha neih dang vawi hnih chu ṭha zetin a dan sak.

Team pahnih intawn hmain Liverpool chu chak tura beisei zawk ni mah se an khelh danah erawh team 'tenau' zawk an ni a, si khat chauh phur chunga second leg an hmachhawn thei tur hi lawm tur an ni - Jurgen Klopp-a'n League Cup nomawi chawi a duh chuan a naute hnenah thu ṭha a hrilh hnem lehzual a ngai ang!

Saints chu le

Liverpool-in inkhel ṭan­tir lamah Roberto Firmino hmangin Saints goalkeeper Fraser Forster 'enchhinna' an nei a, hemi hnuah erawh Saints tan buaina tur a awm tawh lo - an khelmualah inkhel an thunun chhunzawm.

Claude Puel-a naute hian Reds-in ball an chan hlekin chuh let tuma theihtawp an chhuah chhunzawm ṭhin avangin Liverpool an hlauhawm hleithei lo a, Redmond leh Rodriguez ten a khat mawi tawkin Liverpool tlarhnung an rum ṭhaih deuh reng bawk.

Reds tan Karius

Jurgen Klopp-a'n nipui transfer-ah a club hlui Mainz aṭangin goalkeeper Karius a lalut a, German keeper manah hian pound maktaduai 4.75 an inseng. Klopp-a'n a hnampuipa lakah rinna nghatin Anfield-a lo tlangnel tawh sa goalkeeper Simon Migonlet aiah Karius a ring zawk a, first choice keeper-ah a hmang.

Mahse, Klopp-a'n thutlukna dik lo a siam niin a lang hman a, Bournemouth laka 4-3 a an tlawm ṭum leh West Ham nen 2-2 a an inhnehtawk ṭumin Karius hi Reds-in point an hloh chhanah kawh rawn a ni a, league match-ah Klopp-a'n a chhawr zui lo bawk.

Borussia Dortmund boss hlui hian a keeper inrintawkna zawng zawng lak kian sak vek erawh a duh lo, league match-ah chhawr lo mah se Cup inelna lamah Karius hi a chhawr thung. Kum 23-a upa keeper hian Saints an hmachhawnna inkhelah a thiam ala theihnghilh lo tih a pholang nghal a, vawi tam Saints dang chattu hi league lamah a hmel kan hmu tam leh sawt a nih pawn a mak lo ang.

Eng nge an sawi?

Southampton manager Claude Puel chuan, "Inkhel pumpui kha kan thlir chuan Liverpool khan chance vawi khat chiah an nei a ni. Chak zawkah ṭang mah ila khualmuala Liverpool tum hautak zia ka hria a, si khat chauha hnehna kan chang kha chu kan vanduai a ni. He inelna hi nuam ka ti a, tunah erawh kan rilru leh ngaihtuahna zawng zawng Premier League lamah kan pek a hun leh tawh a ni. League match thum chhung a zawnin kan tlawm tawh a, tun hi kan khelh ṭhat chhawm nun hun chu a ni," tiin league lamah rilru pek a hun leh tawh thu a sawi.

Liverpool boss Jurgen Klopp chuan, "Min chhanhim turin Loris Karius kha vawi thum vel lai kan mamawh a, kan tana lawmawm ber erawh goal kan chhuah tlem kha a ni. Anfield-ah hei aia ṭha zawk hian kan khel thei tih ka hria a, tunah hian final lut tur zawk engmah a la chiang lo. Kan khelh danah erawh lawmna tur a awm lo a, Southampton kha chak mah se keini aiin an lawm lo lehzual ang. Dik taka sawi chuan 2-0 emaw 3-0 vela tlawm thei kan ni," tiin khualmualah an vanneih thu a pha lo.

Inkhel chhehvel
• Southampton-in Liverpool nen an inkhelh hnuhnung match ngaa vawi li ngawt tlawm hmel (vawi khat inhnehtawk) an hmuh hnuah tun hnaia team pahnih intum vawi thumah tlawm hmel an hmu ta bik lo. Vawi hnih hnehna changin vawi khat an inhnehtawk a ni.
• Claude Puel-a'n Saints a enkawl hnuah Reds vawi li hmachhawnin tlawm hmel a la hmu lo a, vawi hnih hnehna changin vawi hnih an inhnehtawk.
• Liverpool-in tun season-a Saints an hmachhawn pahnihah target-ah vawi hnih chiah ve ve shot an nei thei a, tun season-a target-a shot an neih tlemna ber Manchester City (vawi khat) hnuaia traget-a shot an neih tlemna ber chu Saints hi an ni.
• Jay Rodriguez-a'n Redmond goal khung tur a siamsak kha January 2014-a Arsenal laka assist a neih hnua a ṭhiante khung tur a siam sak leh hmasak ber a ni.
• Southampton-in EFL Cup khelh mekah match li ngawt chu goal an chhuah lo a, goal chhuah lo rei ber team an ni.