Bagan hmachhawn turin Lajong an inpeih
Zanin dar 7:00 hian Mohun Bagan chuan Mizo tamna Shillong Lajong an mikhual dawn - an match hmasa bera Bengaluru laka 3-0 zeta mualpho tawh Lajong-in tlawm nawn an tum lo a, January 8 khan an inkhelhna tur hmun Kolkata khawpui an thleng fel der tawh.
Bengaluru an hmachhawn ṭuma substitute bench aṭanga tlan lut Lajong midfielder Jacob Lalrawngbawla chuan, "Mohun Bagan hi kan hneh theih loh na chhan tur a awm lo a, huphurhna rilru pawh kan pu lo," tiin Vanglaini palai hnenah Kolkata club lian an hlauh loh thu a sawi a, zaninah khelmualah a chhanna dik tak hmuh turin a awm ang.
Hliam hlui a dam
Hmarchhak aṭanga I League khel hmasa ber club Lajong an vanduai a, season bul ṭanna league match hmasa pahniha club lian Bengaluru leh Bagan khualmuala hmachhawn ve ve hi an ṭawngṭai chhanna a ni bik lo ang.
Manipur lam chhuak coach Thangboi Singto kaihhruai team hi an match hmasa berah Bangalore club lakah mualpho mah se Mizo tlangval Jacob-a chuan an result chu an hnuchhawn tawh thu a sawi. Tlungvel tlangval chuan, "Football-ah chuan chak zawk nih chang a awm ang a, a chang chuan a tlawm zawk pawh kan ni ang. Mahse, chu chu hriatreng a ṭul lo a, tunah chuan kan hmabak hi eng takin kan thlir a ni," a ti.
Lajong-ah hian Mizo player Jacob-a bakah Zodingliana Tochhawng, Joseph Lalfakzuala, Lalrammuana, Isaac Vanmalsawma leh Samuel Lalmuanpuia te an awm a, Joseph-a leh Rammuana tih loh zawng chu Kolkata-ah hian hruai an ni.
Aizawl FC-in Mizoram Police aṭanga an hawh V. Lalṭanpuia unaupa Jacob chuan Bagan hmachhawn tur la hriat loh mah se Bengaluru hmachhawn team aṭangin an danglam tam a rin loh thu a sawi a, Bangalore-a inkhelah hian Hnahthial tlangval Isaac chu Mizo zinga inkhel bul ṭantu awm chhun a ni.
Mahse, Bengaluru lakah an mualpho avangin Thangboi-a'n Adinga leh Samuel-a te inkhel bul a ṭantir a nih pawn a mak lo ang.
Jeje-a tel lohna
Mizo tlangval Jeje Lalpekhlua'n Mohun Bagan match hmasa bera Churchill Brothers 1-0 a an hneh ṭumin hliam vangin a hmel a lan thei lo a, zaninah pawh Hnahthial tlangval hian inkhel bul a ṭan a beiseiawm lo.
AIFF player of the year nilai Jeje chuan, "Club training zawm tawh mah ila 100% in ka la in fit lo a, indim deuh ka la duh. Zaninah pawh inkhel bul ṭan turin ka la inpeih lo a, duhthusamah chuan inkhelh rih loh hi ka taksain a mamawh zawk a ni," tiin Vanglaini palai hnenah hliam vanga a la inlan theih loh tur thu a sawi a, club-in an mamawh huna hman tur erawh chuan India international striker hi squad-ah a awm tho ang.
Mohun Bagan hian season khata nuai 250 hlawha an sawi Sony Norde an la chhawr thei dawn lo. Haitian forward hian Nilaini zan khan India a rawn thlen ve chauh avangin squad-ah pawh a awm dawn lo a, Lajong tlarhnung tan chuan Jeje leh Norde inlan lo tur hi hahdam phah sawtna tham a ni.
Hetihrual hian Bagan hian Jeje awm loh hlana goal khungtu Balwant Singh bakah Swansea City striker hlui Darryl Duffy an la kawl tho a, anni pahnih ngawt pawh hi buaipuitham an tling khawp ang.