Barcelona chakna MSN

Copa del Rey quarterfinal lut turin Barcelona-in fiahna an paltlang. Catalan club hian last 16 first leg a 2-1 a an ngam loh Athletic Bilbao chu Nilaini zan khan 3-1 a lehthalin inkhel pahnih belhkhawmah 4-3 in an tlang. Barca tan hian Lionel Messi, Luis Suarez leh Neymar ten goal an khung.

Barcelona tlarhma 'MSN' te hian kum 2014 aṭanga an khelh ho hnuah club tan goal 300 an khung tling der tawh. Season hnih leh a chanve chhunga Messi (124 goals), Suarez (100) leh Neymar (76) te goal khung hi sawi ropui chawp a ngai lo. Tun season-ah hian La Liga-ah Real Madrid phak lo mah se Champions League leh Copa del Rey nomawi te an la beisei thei thung.

Suarez goal 100

Nou Camp-a inkhelah Bar­celona tan Liverpool striker hlui Luis Suarez chuan minute 35-naah mawi taka volley lutin goal hmahruai a khung. Uruguay international hian Barcelona tan match 120 a khelh aṭangin goal 100 a khung tling der tawh.

Kum 29-a upa Suarez hi Barca player zingah goal 100 khung tling tura match mamawh tlem pathumna a ni a, a tluk loh te chu Mariano Martin (99 games) leh Hungarian striker Laszlo Kubala (103) te chiah an ni - Lionel Messi-a'n match 188 a mamawh.

Goal hnih dang

Brazil captain Neymar chuan second half ṭan tirah ama penalty hlawh chhuah aṭangin an goal hnihna a khung a, a club tan minute 1,021 hnua a goal khung lehna hmasa ber a ni - Catalan club tana goal a khung hnuhnung ber chu nikum October 19 daih tawh kha a ni!

Mikhual Bilbao tan Saborit Teixidor-a'n goal khat khung ve mah se yard 20 a hla aṭanga Messi free kick pet luh hmangin Barcelona-in an chak an nemnghet a, a zawna a vawi sarih nan Copa del Rey quarterfinal an lut.

Argentina forward Messi hian kum 2017-ah match thum khel tawhin hengah te hian free kick aṭangin goal a khung vek. Messi hian Barcelona tan free kick aṭangin goal 26 a khung tling tawh a, Ronald Koeman record a nih rual chiah - record thar siam turin hun leh theihna a nei.

Messi an fak e

Barcelona manager Luis Enrique chuan, "Mahni khel­muala khel kan ni bawk a, min ṭantu fan-ten an tih tur dik tak an ti. An puihna zarah ṭha takin kan khel chhuak a, goal khung hmasa kan nih avangin a dang kha chu a awlsam tawh. Cup inelna lama result ṭha kan nei hian league-ah pawh nghawng ṭha a neih chhunzawm ka beisei," a ti.

Spanish manager chuan free kick pettu Messi fak zuiin, "Lionel Messi aia ṭha hi khawvelah an awm lo. Free kick a ni emaw, ni lo emaw pawh nise buaina chinfel dan tur a hre thei zel a, ani hi chuan a ṭhiante hi player ṭha lehzualah a siam chhuak zawk a ni," tiin a fak hle.

Barca tana goal 100 khung tlingtu Suarez chuan, "Leo hi chuan inkhelh apiangin khawvela ṭha ber a nihzia a pholang ṭhin. Thil mak leh danglam pakhat tal hi min hmuhtir ve ziah," a ti.

Suarez chuan a goal chung­chang sawi zuiin, "Club ropui Barceloan tana goal 100 ka khung tling thei hi a nuamin a hlimawm a, a pawimawh ber erawh ka goal khung hmanga Copa del Rey quarterfinal kan lut thei kha a ni," tiin a sawi bawk.

Hmabak

La Liga match 17 khelh tawh aṭangin Barcelona hian point 35 an hmu a, league table-ah pathumna an ni. Hmahruaitu Real Madrid chuan point 40 hmu tawhin match khatin an khel tlem zawk a, pahnihna Sevilla chuan point 36 an hmu thung. Enrique naute hian Inrinni zanah Las Palmas an mikhual zui leh ang. Table-a pasarihna Bilbao hian Leganes an lenchilh thung dawn a ni.