Djokovic-a'n champion a tum ruh

Novak Djokovic chuan a vawi sarih nan Australian Open nomawi chawi a duh thu a sawi. Kumina Grand Slam hmasa ber tur hi January 16-29 chhungin Melbourne, Victoria-ah khelh a ni ang.

Serbian thiampuipa Djokovic hian nikum khan final-ah Andy Murray hnehin a vawi ruk nan a champion a, US legend Roy Emerson record a tluk chiah. Kuminah a hlawhtling leh a nih chuan he inelnaa champion hnem ber a ni dawn.

Kum 29-a upa Djo­kovic chuan, "Andy Mur­ray hian number 1 nih hi a phu a, chuh buai theih a ni lo. Nikum kumtawp lam thla ruk chhung khan a khel ṭha takzet a ni. Kuminah pawh keini pahnih bawk hi kan inel nasa leh ngeiin a rinawm a, ani hneh turin ka inbuatsaih nasat a ngai," a ti.

Grand Slam vawi 12 champion tawh Djokovic hian season hmasa kha duhthusama ṭhain a tawp khar lo mah se a insiamṭha tawh. Kumina a tournament khelh hmasa ber Qatar Open-ah a zawna match 28 chak thei Murray hnehin a champion leh tawh a, inrintawkna a neih ṭhin ang kha a nei let leh tawh ngei ang.

World number 2 chuan inelna lian an khelh tur sawi chhunzawmin, "Australian Open hi keimah chauh ni loin player dang zawng zawngte pawhin kan nghakhlel vek a, a nuam leh dawn. Mi tak takin record thar hmuh an chak tih ka hria a, sulhnu ropui thar hnutchhiah chu kei aia chak an awm chuang lo ang - a vawi sarih nana champion ngei turin theihtawp ka chhuah dawn a ni," tiin a sawi.