Swansea assistant manager thar Makelele
Welsh club Swansea City chuan Chelsea midfielder hlui Claude Makelele chu an club assistant manager thar ni turin an lalut a, France international hlui hian season tawp thleng cham turin contract a ziak.
Makelele hian tun hmain Swans boss thar Paul Clement hi a lo thawhpui tawh ṭhin. Chelsea tana a khelh laiin kum 2007-08 inkarah khan Paul hi assistant manager niin Makelele enkawltute zinga mi a ni a, Paris St-Germain-ah khan Italian coach ropui Carlo Ancelotti kaihhruaina hnuaiah assistant hna an lo chelh dun tawh bawk.
France tana vawi 71 inlan tawh Makelele hian Nantes tana a khelh laiin Ligue 1 nomawi vawi khat chawi tawhin Real Madrid-ah La Liga nomawi vawi hnih chawiin Champions League-ah a champion bawk a, Blues tan a khelh lai khan Premier League nomawi pahnih chawi hmanin kum 2006 World Cup final-a chak lo zawk France squad-ah pawh khan a tel phak hial a ni.
Monaco lama technical direcrtor dinhmun pawh lo chelh tawh Makelele hi Tottenham Hotspur aṭanga Clement zawm hlim Nigel Gibbs leh Karl Halabi te nen an thawk ho ang.