50 not out - Kazu Miura

Japanese striker Ka­zuyoshi Miura chuan kum 50-a tlin thlenga professional football khel turin thutlukna a siam a, second-tier club Yokohama FC-ah kum khat dang khelh chhunzawm turin contract thar a ziak.

Kum 17 liam taa inter­national football chawlhsan tawhtu striker hian nikum khan kum 49-a upa nichungin J League second division-a FC Gifu 2-1 a an hnehṭumin goal a khung a, ama record lo siam tawh chu khumin Japanese football league a goal khung thei upa ber a ni.

Japan tan vawi 89 inlana goal 55 khung thei striker hian February 26-ah khian kum 50 a tling tawh dawn a, season hmasa khan league-ah match 20 khelin goal hnih a khung. A inlan tam zawk hi hun tawp hnaih lama bench aṭanga a tlan luh a ni thung.

Brazilian club ṭha San­tos-a a career ṭantu striker hian Europe lamah pawh Genoa leh Dinamo Zagreb tan kum 1990 chho khan reilote chu a lo khel ve tawh a, tuna a club khelhna Yokohoma-ah hian kum 2008-ah khan kum 38-a upa nichungin a lut a ni.

Professional foot­ball-a a season 32-na hmang tura inpuahchah mek Kazu chuan, "Ka club khelhna ṭantu, ka team mate leh min thlawptute zawng zawng puihnain theihtawp chhuah chhunzawm zel ka tum a ni," a ti a, inkhelh nuam a la tih hmel hle.