Spurs leh United an inhnehtawk

Premier League inkhel ngaihven hlawhah Zirtawpni zan khan Tottenham Hotspur-in Manchester United an mikhual a, 1-1 in an inhnehtawk.

Jose Mourinho hoten Steven Bergwijn hmangin minute 27-naah an khung hmasa a, substitute Paul Pogba penalty hlawhchhuah hmangin United tan Bruno Fernandes-a'n minute 81-naah si phurh a sut.

Tottenham tan Son Heung-Min leh Harry Kane ten bul an ṭan a, Lucas Moura leh Dele Alli te erawh hliam leh hrem vangin squad-ah an awm lo.

Manchester United erawh an kim ṭha a, hun rei tak inhliam vanga inlan tawh lo Pogba erawh bench-ah dah a ni a, mipui hmuh châk Fernandes leh French midfielder inkawp erawh second half-ah chiah hmuh tur a awm.

Ole Gunnar Solskjaer-a'n goal veng turin David de Gea a hmang a, khawvel defender manto ber Harry Maguire-a'n tlarhnung a ho. De Gea hi tun hma ang kha a ni tawh lo a, khawvel keeper ṭha bera chhal ṭhin khan chet fuh loh ṭum a nei ta zeuh zeuh a, team chhanchin himtu ni ṭhin kha team ti hnualtu a ni ta fo.

Spurs nen pawh United-in bul ṭan ṭha hret mah se Spurs-in an chance ṭha neih hmasak berah goal a khung. Luke Shaw ball tauh ṭhat tawk loh aṭangin a inṭan a, Dutch forward Steven Bergwijn-a'n chiang takin Maguire a tlan pel a, kawh zetin goal-ah pet mah se a goal chhan tak erawh De Gea tih ṭhat tawk loh vang a ni.

United captain hlui Roy Keane chuan, "Maguire leh De Gea te chet dan ka hrethiam thei lo. Ka thu ni se team bus-ah pawh chuan ka phal lo ang a, a hranpain taxi ka laksak ang. A sang pali zinga awm kan tum a, nomawi pawh kan sawi tawh lo. An hna thawk rawh se, an chetdan kha a zahthlak hle," tiin goal luh dan chungchang a sawi.

Manager Solskjaer chuan, "Roy hi ka ṭhian ṭha tak leh midfielder ṭha tak a ni a, a dang thei kher ang em tih ka chiang bik lo," tiin a teammate hlui lakah a player-te a chhan.

Khelmual pawnah Marcus Rashford a hming ṭha a, khelmual chhungah erawh French forward Anthony Martial te nen an a la bil rih. Spurs striker Harry Kane pawh hun rei tak a inlan tawh lo tih a hriat a, South Korean forward Son erawh Covid-19 hma ang thoin United tlarhnung tan buaipui tham a ni a, De Gea-a'n a goal khung tur ṭha takin a dansak.

United midfielder Fred-a'n Covid-19 vanga chawlh hnuah pawh class tawk lohna a nei chhunzawm zel a, chutihrualin Solskjaer-a'n Pogba a luhtir lawk lo. Minute 63-naah French midfielder a rawn inlan a, theihna a neih san zia pholang turin hun tam a mamawh lo.

Penalty hlawhchhuak tur hian Pogba-a'n Spurs player Eric Dier chu chiang fahranin a bum a, Bruno Fernandes-a'n chiang zetin keeper Hugo Lloris a bum a, minute 81-naah 1-1 a ni. United-in goal dang khung tumin an nawr chhunzawm a, hun tawp hma hretin referee Jon Moss-a'n penalty a pe nawn - Dier-a'n Fernandes lakah foul a neiah a ngai. Amaherawhchu VAR hmanga en let a nih hnuah penalty pekna tur a ni lo tih hmuh a ni a, mual sira lungawi loh avanga inhrosa Mourinho pawh a tho huai ang.

Jose Mourinho-a'n player chhawr bik a nei ṭhin a, match pawimawhah risk a la meuh lo. United nen pawh hian bench aṭangin player pahnih chauh a luhtir a, Solskjaer erawhin player panga a thlak thung.

Spurs boss Mourinho chuan, "Tlarhnung a phui ṭha a, penlaty a pe ta mai erawh mak ka ti hle. Pogba-a'n a tih tur a ti a, referee Jonathan Moss pawhin a hna ṭha thei ang bera thawh a tum. VAR chungchanga ka ngaihdan erawh a danglam thung," tiin penalty an pek danah ka lawm  lo.

Player chungchang sawiin, "Hun tawp lamah kha chuan Lucas leh Dele te mamawh hlein ka hria. Kan khingpui te bench leh kan bench in thlir chuan a danglamna inhria ang. West Ham nen kan khelh hunah chuan ka hman theih tawh ka beisei a, tun ang hunah chuan squad neih ṭhat a pawimawh," tiin a squad chu a pan deuhah ngaih thu a sawi.

Spurs-in player pahnih chauh an thlak avangin hun tawp lamah United an ngam lo a, striker rinrawl Kane te an chauh tawh laiin minute 62-naa inlan United rawlthar Mason Greenwood ten tha hrui an la nghah hle. Thawhlehni zan dar 12:45-ah Spurs-in West Ham an mikhual ang a, Nilaini zan dar 10:30-ah United-in Champions League khel tura an elpui Sheffield United an mikhual thung ang.