Liverpool 'quadruple' - Beiseina chauh nge a tak ram?

Liverpool-in zanin dar 12:30 hian Champions League semifinal second leg khel turin El Madrigal-ah an lenglut dawn a, Villarreal an hmachhawn dawn. Reds hian first leg-ah inkhel thunun chungin Anfield-ah 2-0 in an hneh tawh a, Jurgen Klopp-a hote hi final lut turin an dinhmun a ṭha hle.

Reds hian League Cup nomawi an chawi tawh a, nomawi pathum dang Premier League, Champions Leauge leh FA Cup-ah beisei an la nei. Klopp-a hote 'quadruple' beiseina hi thil theih loh a ni tawh lo a, thil thleng thei a ni tawh!

Reds an mawi
Football-ah chuan chak loh theih a ni a, tun hnaia Liverpool khelh dan erawh chak lo thei lo ang mai an ni thung. Klopp-a hote hian game mawi an lantir a, attack football an khelh tel avangin champion tur pawhin an buk a rit hle.

Mohamed Salah, Sadio Mane leh Luis Díaz te hmangin Anfield-ah Yellow Submarine an nawr tawm a, Thiago Alcantara, Fabinho leh Jordan Henderson te hmangin khel an thunun. Tlarhnungah Virgil van Dijk a awm chuan, a kawppui chu Ibrahima Konate, Joel Matip emaw Joe Gomez pawh ni se buaina a awm lo.

Mual sir aṭangin Andrew Robertson leh Trent Alexander-Arnold te hmangin an la nawr thei zel. Juventus leh Bayern Munich hnehtu Villarreal-in tih ngaihna tak an hre lo a, Unai Emery hoten goal hnih chhuah mah se minute 90 chhunga an khelh dan thlirin lawmna tur a ni zawk.

Eng nge thleng dawn?
Villarreal hi 'giant killer' hminglem an pe a, Bayern leh Juve hnehtu an nih bakah season liam ta khan Europa League final-ah Manchester United an hneh avangin 'giant killer' tih hi an inhmeh hle.

Liverpool lakah erawh Yellow Submarine tan thawhchhuah a harsa dawn a, Reds hi an dal thei a nih chuan thilmak a ni hial ang. Jurgen Klopp-a hoten hian season nga chhungin final ṭum thum nan thlen an tum a, kartawpa Newcastle an hneh ṭum pawhin Fabinho, Salah, Alcantara leh Alexander Arnold te an dah ṭha thei a, zaninah erawh an kim ṭhap ang.

Chutihrualin Emery hian thil danglam a lo thlentir tawh ṭhin a, an hmabak hau tak zet harsatna belhchhah turin Yeremi Pino a la inhliam bakah an goal khung khawl Gerard Moreno dinhmun a la chiang lo.

Spanish club-in a êng zawnga an thlir erawh chuan an mual El Madrigal-ah an khel dawn a, ṭantu an nei ṭha dawn. Emery-a'n tun hmaa a tih ṭhin angin ruahmanna ṭha bik a duan a ṭul dawn a, goal mamawh mah se goal venhim erawh a ngaih pawimawh hmasa a la ni tho ang.

Eng nge an sawi?
Villarreal manager Unai Emery chuan, "Second leg-a beiseina kan neih nan first leg-ah theihtawp chhuahin goal venhim hna kan thawk a ni. Kan mualah (El Madrigal) chuan kan danglam dawn a, fiahna tam zawk hmachhawn tir kan tum ang," tiin beiseina an la neih thu a sawi.

Liverpool manager Jurgen Klopp chuan, "Tun dinhmunah chuan engkim a ṭha e. Inring renga awm a ṭul a, 2-0 a hma kan hruai tawh avangin semifinal khelh ṭan hma ai khan kan dinhmun a ṭha zawk. Chutihrualin final kan la thleng lo," tiin tha thlah theih an nih loh thu a sawi.

Away Goal Rule
Tun season aṭangin UEFA hnuai inelnaah away goal rule a awm tawh lo. Second leg khelh zawhah team pahnih an inhnehtawk a nih chuan extra time khelh a ni ang a, an la inhnehtawk cheu a nih chuan penalty shootout hmangin chak zawk zawn a ni ang.

Champions League Semifinal
FIRST LEG
April 26, Thawhlehni Zan
Manchester City 4 - 3 Real Madrid
MAC: Kevin de Bruyne 2'; Gabriel Jesus 11', Phil Foden 53'; Bernardo Silva 74'
REA: Karim Benzema 33', 82' (P); Vinícius Júnior 55'

April 27, Nilaini Zan
Liverpool 2 - 0 Villarreal
LIV: Pervis Estupinan 53'; Sadio Mane 55'

SECOND LEG
Zanin Inkhel Tur
Villarreal 12:30 AM Liverpool

May 5, Nilaini Zan
Real Madrid 12:30 AM Manchester City

Bul ṭan tura beisei?
Villarreal: Rulli; Foyth, Albiol, Pau Torres, Estupiñán; Parejo, Capoue, Coquelin; Chukwueze, Lo Celso, Boulaye Dia
Liverpool: Alisson; Alexander-Arnold, Konaté, Van Dijk, Robertson; Henderson, Fabinho, Thiago Alcántara; Salah, Mané, Luis Díaz