Pakhat a hmin, Pathum dang a la awm?

League Cup : Champion

Liverpool-in tun season-a nomawi an chawi hmasak ber chu Carabao Cup a ni a, February 17 khan Wembley Stadium-ah Chelsea an hneh. Final hmuhnawm takah hun pangngaiah goal a lut lo a, penalty shootout-ah 11-10 in Reds an vannei.

Reds hian nomawi chawi turin Norwich City, Preston North End, Leicester City, Arsenal leh Chelsea te an hneh. Jurgen Klopp-a hnuaia League Cup-a an champion hmasak ber ṭum a ni a, German manager hnuaiah FA Cup chiah an chawi ta lo.

FA Cup : Final

Liverpool-in May 14, Inrinni zanah Chelsea nen Wembley Stadium-ah FA Cup final an khel dawn. Jurgen Klopp hi FA Cup-ah a la champion ngai lo a, an khingpui tur Blues hi season liam ta finalist Blues an ni.

German manager Klopp-a hote hian League Cup final-ah Thomas Tuchel hote an hneh tawh a, nomawi chawi turin beiseina sang tak an nei. Final thleng tur hian Shrewsbury Town, Cardiff City, Norwich City, Nottingham Forest leh Manchester City te an hneh a ni.

Premier League : 2-na

Liverpool-in Premier League-ah point 82 hmuin pahnihna an ni mek a, hmahruaitu Manchester City chu point khat chauhin an pha lo. Reds hian Tottenham Hotspur (May 7, Inrinni zan), Aston Villa (May 10, Nilaini zan), Southampton (May 17, Thawhlehni zan) leh Wolverhampton Wanderers (May 22, Pathianni zan) te an la hmachhawn dawn.

Liverpool hi Man City-in point an hloh chauhin an champion thei a, Pep Guardiola hote hian match li an khelh turah Wolves (May 11, Nilaini zan) leh West Ham (May 15, Pathianni) te hi khualmualah an khel dawn a, a bak match hnih Newcastle United (May 8, Pathianni zan) leh Aston Villa (May 22, Pathianni zan) te hi Etihad Stadium-ah an khel dawn.

Reds leh City hian Steven Gerrard-a kaihhruai Aston Villa an la hmachhawn ve ve dawn. Gerrard hi Liverpool champion-na kawng daltu a nih theih rualin champion theihna kawng sialtu a ni thei a, hei hian nomawi inchuh ngaihnawmna a belhchhah ang.

Champions League : Semifinal

Liverpool-in Champions League semifinal an thleng tawh a, an ke vei lamin final an rap tawh a tih theih hial. Europe inelna sang berah hian Reds hi an mikhual lo a, English club zinga record nei ṭha ber lawrlak an ni.

Champions League-ah Liverpool hian vawi kua final lut tawhin vawi ruk an champion a, vawi sarih an champion thei a nih chuan AC Milan record an nih rual dawn. Reds-in Milan tih loa an tluk loh awmchhun chu Real Madrid chauh a ni a, Liverpool-in ropuina ram an hnaih zel.