Europe champion Marin-i

Carolina Marin chuan badminton player ṭha bik a nihna a lan tir nawn leh ta. Spanish star hian European Championship final-ah Kirsty Gilmour chu 21-10, 21-12 in a hneh a, European player ṭha rual inelnaah hian a vawi ruk nan a champion.

Khup hliam vangin Marin hi hun rei tak a chawl. Rio Olympic champion hi Tokyo Olympic-ah khan a nomawi humhim tur pawhin a inlan thei lo, tunah erawh a hliam dam leh tawh a, ṭha takin a inkhel thei leh tawh.

Thla 11 a chawlh hnuah a lo kir a, a thiam erawh a la theihnghilh chuang lo. Tun inelnaah hian a hma a ding - Katerina Tomalova, Maria Ulitina leh Neslihan Yigit te lakah harsatna a tawk lo, final-ah pawh game a hloh loin a chak thei.

World Championship nomawi pawh pathum ngawt chawi tawh Marin chuan, "Ka hlim takzet, hetiang hun tawng leh tur hian ka nghak rei vang vang hle. Khup hliam vanga rei tak chawlh chuan beiseina pawh a tlem hman hle.

"Amaherawhchu, engtik niah emaw chuan hlawlhtlinna ka la chang leh ngei ang tih hi ka suangtuah ṭhin. Hmasawnna tur leh inzir ngaihna lai chu ka la nei ngei mai, tuna ka thlen chinah erawh ka lawm," tiin a sawi.