Arsenal an chak - Hello Europe!

Goal khungtu chu defener pahnih - Rob Holding leh Gabriel Magalhaes an ni a, minute 90 chhunga an inkhel chuan duhthu a sam lo. Mahse, Arsenal hian West Ham 2-1 a hnehin a pawimawh ber point thum an hlawh chhuak miau a, season tharah European football an khel dawn.

Tottenham an chak tih hresa in Gunners an inlan. Spurs hian Premier League table-ah palina aṭangin Mikel Arteta naute hi an nek chhuak lailawk, boruak rit tak hnuaiah hnehna changin Champions League khel phak chinah an awm leh ta.

Arsenal hian season tharah European football chu an khel ngei dawn. UCL, Europa League nge Europa Conference League tih erawh a la chiang lo. Antonio Conte naute nen an inkarah point hnih chauh a awm; May 13 hian North London Derby a awm dawn.

UCL rim a nam
Premier League aṭanga a sang paliin Champions League an khel a, pangana leh parukna ten Europa League khelin, pasarihnain Conference League an khel thung. Season hmasa khan heng inelna pathumah hian Arsenal an lang pha lo!

Tunah chuan, season thara UCL khelh leh khelh loh chu an kuta innghat a ni leh ta. London Stadium-a inkhelah, khel ṭha tawk lo mah se an mamawh zat goal an khung thei. Forward Bukayo Saka-a corner pet chu Ben White inhliam vanga lut Holding-a'n a tauh lut.

Chawlhlawk hmain Hammers lamin Jarrod Bowen hmangin an sut, defender Nuno Travares-a'n a ven tur a veng tawk lo a, awmna tur hmun a thlan dik loh avangin David Moyes-a nauten hmunruak zau tak an neih phah, goal an khung phah reng bawk.

First half-ah 1-1 a ni a, Arsenal-in second half-ah corner kick aṭang bawkin goal hnihna an khung. Minute 54-naah ball per dawngtu Gabriel Martinelli-a'n amah ang bawka Brazilian player Gabriel a hmu fuh a, a ball siamsak chu a tauh lut; Gunners hi tun season EPL team zingah corner aṭanga goal la chhuah lo awmchhun an ni thung.

Hammers an buai
David Moyes-a hoin season duhawm an hmang - Europa League semifinal hial an thleng. Premier League club lian dangte tana hnawksak tham an ni bawk, mahse season chawhnu lamah squad chhah tawk lohna a lang a, an talbuai mek.

Hliam vangin defender pathum Craig Dawson, Issa Diop leh Angelo Ogbonna te an chhawr thei lo. Kurt Zouma bulah left back Aaron Cresswell a din a ngai, anni pahnih hian Eddie Nketiah an veng hneh lo, goal hnih chauh an chhuah kha an vannei.

Europa League lama Eintracht Frankfurt an tum leh tur hisap tel a ngai bawk si. German lakah 2-1 a an hniam mek avangin goal an mamawh dawn, striker Michail Antonio chu Gunners lakah hian bench-ah hahchawlhtir hmasak a ni a, a tawp lamah lut mah se danglamna a siam lo.

Declan Rice leh Bowen te erawh West Ham innghahna leh ti hmuhnawmtu an ni chiang. Amaherawhchu, anni pahnih pawh hian anmahni muala league match ruk chhung tlawm loa an kaltluang chu an vawn nun pui thei lo, taksa leh rilru tih hahdam an mamawh.

Spurs an hnai reng
Tluk leh din fawmin an kal a, player ṭha bik Harry Kane leh Son Heung-min an neih miau avangin Tottenham an hniam tak tak thei lo. Son-a goal hnih leh striker Kane-a goal khat hmangin Leicester City 3-1 in an hneh.

Antonio Conte chuan, "Point thum hlu bik a ni. Nikum November thlaa he hmuna ka lo kal hunlai kha ngaihtuah let ta ila. Tuna Champions League khel tum zinga kan la tel thei hi thil lawmawm a ni, mi tam tak rin phak bak a ni hial ang," a ti.

Italian manager chuan sawi zawmin, "Premier League aṭanga Champions League khel phak hi chu a awlsam lo," a ti. A match lehpekah Liverpool khel turin Anfield an tlawh dawn, inkhel hautak leh harsa hmachhawn turin inbuatsaih nghal an ngai.

Chak lo Leicester manager Brendan Rodgers-a'n EPL aiin Europa Conference League a ngai pawimawh zawk. AS Roma hmachhawntu player pariat ngawt a siksawi a, Italian club nen 1-1 a an inhnehtawk mek avangin, semifinal second leg khel turin player a khek.

A nihna tak sawi chuan kan khel ṭha lo, ka sawi thiam dan chuan khel ṭha lo tak chunga point thum hmu kan ni. Chutih rualin, team ṭha chuan harsatna kara hnehna chan dan kawng an hre ṭhin, mahni inveng chunga corner kan hmang ṭangkai kha a lawmawm. - Mikel Arteta, Arsenal Manager

Loh theih lohin player kan siksawi a ngai, kan hlauhthawn ruk ang ngeiin min rawn hrem chat chat a ni ber. Ven theih nia ngaih set piece aṭanga goal chhuah hi chu a pawi, duhthu kan sam tawk lo a ni.
- David Moyes, West Ham Manager