Chelsea hnehtu Lampard

A chiang vek tawha ngaih kha a chiang lo leh ṭhin - football a nih miau avangin sawi lawk a harsa. Premier League-ah Chelsea hi pathumna ni chiang tura ngaih an ni a, tunah chuan 100% a chiang a ni ta lo.

Blues hi tlak hlau Everton mualah 1-0 in an tlawm. Thomas Tuchel-a naute hi pathumna la ni mah se, an hnuaia awm Arsenal nen an inkarah point thum chiah a awm, khelh hmabak pali an la neih avangin an dinhmuna a la inhtlak daih thei.

Frank Lampard-a enkawl Everton pawh Chelsea lakah tlawm ni se la chuan inhamtan a harsa tawh ang. Mahse, Richarlison-a goal khat hmangin an mikhual an hneh miau a, season thara Premier League khelh beiseina an la nei zel.

Leeds leh Burnley te aia point nga zeta hniam chungin Chelsea an mikhual a, tunah chuan Lampard-a naute hian an elpui club pahnih an phak lohna chu point hnihah an sawr zim, match khatin an khel tlem bawk.

Chelsea an hneh theih nan hian, forward Richarlison-a goal a pawimawh tluk zetin keeper Jordan Pickford mawhphurna a pawimawh. Toffees keeper hian Mason Mount-a shot ṭha zet dan tumin a zuang a, ball in goal ban a per.

Ball per hi mual sir lam aṭangin Cesar Azpilicueta-a'n laklawh nei miah loin a lo shot, goal chiang tura ngaih hi Pickford-a'n a dang hman! England keeper hian Ruben Loftus-Cheek leh Antonio Rudiger te khung tur a dansak pawh turu tak a ni.

Goodison Park-ah thawm a ṭha a, an theihna zawng zawngin point thum hmuh an tum tih a lang. Hun tawp dawnah Blues defender Reece James-a ball chhar tur chu Everton fan pakhatin a lak khalh a, a khawr hnuaiah a dahṭha - hei hian Toffees boruak a hrilhfiah.

Hei ringawt hi a ni lo, inkhelh hma zanin Chelsea player riahna hotel bulah puak thei thil an hal chiam. Everton fan-te chet hun hi zan dar 2:40 a ni a, darkar khat leh a chanve chhung an hal. Premier League-a inhamtan ngei tumin Toffees ṭantuten theihtawp an chhuah a, Goodison Park-a an thawm pawh ring tak a ni.

Everton manager Lampard chuan, "Hmul thi a ding sung sung thei, khatiang khawpa thlawpna ṭha kan dawn avang khan ka lawm. Fans hi player 12-na an ni tih a takin kan hmu, mipa, hmeichhia leh naupang thlengin an theihna zawng zawng an hlan," tiin fans a fak.

Beisei an neih thu sawi zawmin Blues midfielder hlui chuan, "Burnley leh Leeds inkhel kan thunun thei lo, kan inkhel erawh kan thunun thei. Pawna lam thu ngaihtuah vak ai chuan, a taka kan thawh a ngai dawn," a ti a, inhamtan theih ngei a inring.