Warriors leh Bucks an chak

Golden State Warriors leh Milwaukee Bucks ten nimin zing khan, anmahni conference semifinal ve ve an khel ṭan. An khingui lakah hnehna changin hmalam an pan, conference champion an nih chuan NBA Finals-ah an intawng thei dawn.

Western Conference semifinal game 1-ah Warriors hian Memphis Grizzlies chu 117-116 in an hneh hram, an chak theih nan hian hun tawp dawnah Klay Thompson chuan 3-points a vawm lut a, chak turin vanneihna an mamawh tel.

Hamrik hnuhnung rik hma hretin Grizzlies guard Ja Morant-a'n remchang a nei, mahse a lay-up chu a hlawhtling lo. Nilaini zing dar 7:00-ah game 2 an khel leh dawn, chak zawk tur sawi lawk harsa khawpin team pahnih an inhnaih.

Warriors hian second half-ah forward Draymond Green an chhawr thei lo. American player hi a foul vangin hnawhchhuah a ni a, chawlhlawk hma deuha Brandon Clarke laka a chet dan avanga hrem a ni; a tel lo chuan GSW inkhel a nghet tawk lo.

Inkhel dangah Milwaukee Bucks chuan Boston Celtics lakah 101-89 in hnehna an chang. Eastern Conference semifinal inkhel hmasa berah Giannis Antetokounmpo chu player langsar ber a ni.

NBA Most Valuable Player vawi hnih ni tawh hian triple double a nei! Point 24 a neih bakah rebound vawi 13 a la a, assist vawi 12 zet a nei bawk - Bucks lamin hnehna an chan theih nan a thawh hlawk takzet.

Bucks guard Jrue Holiday chuan point 25 a nei bawk a, Celtics tan Jayson Tatum chuan point 21 nei ve bawk mah se hnehna chan nan a tawk zo lo. Nilaini zing dar 4:30-ah game 2 an khel chhunzawm leh nghal ang.

NBA Playoff
Eastern Conference Semifinal
Game 1: Milwaukee Bucks 101 - 89 Boston Celtics
(Bucks hian series-ah 1-0 in hma an hruai)
May 4, Nilaini
Game 2: Boston Celtics 04:30 AM Milwaukee Bucks
Western Conference Semifinal
Game 1: Golden State Warriors 117 - 116 Memphis Grizzlies
(Warriors hian series-ah 1-0 in hma an hruai)
May 4, Nilaini
Game 2: Memphis Grizzlies 07:00 AM Golden State Warriors