UCL khelh beisei Wolves

Inrinni zan Premier League inkhelah Wolverhampton Wanderers-in Raul Jimenez leh Neto goal hmangin tla thei dinhmuna ding West Ham 2-0 in an hneh. Wolves hian pangana Manchester United nen khelh zat inangah point 46 an hmu a, Champions League khel turin beiseina sang tak an nei. 

London Stadium-ah first half-ah goal a lut lo a, Hammers hian first half-ah goal zawnah an pet lo a, minute 49-naah kum 19 mi defender Jeremy Ngakia-a'n hla tak aṭangin goal zawnah a pet ve chauh.

Minute 73-naah Adam Traore-a'n ding lam aṭangin ṭha zetin a cross a, Mexican striker Jimenez-a'n a tauh goal. Minute 84-naah goal mawi zawk hmuh a ni a, ding lam aṭang thoa Matt Doherty cross chu Neto-a'n kawh zetin boruaka a awm laiin a volley lut.

Inkhel dangah Leicester City leh Watford te 1-1 in an inhnehtawk. Foxes hi chak zawk tura ngaih ni mah se mahni muala khel tlak hlau Hornets an ṭang thei hle.

Ṭan phat aṭangin inkhel a nung a, goal chance a tam bawk avangin a hmuhnawm hle. Leicester keeper Kasper Schmeichel-a'n hna a ngah a, Watford-in chance ṭha ngah zawk mah se Foxes-in goal an khung hmasa zawk. 

Minute 90-naah Ben Chilwell-a'n Leicester tan kawh tak maiin a pet goal a, chakna goal tura ngaih a ni. Amaherawhchu injury time minute thumnaah Craig Dawson-a'n bicycle kick hmangin Watford siphurh a sut a, 1-1 in inkhel a tawp.

Champions League khel turin Leicester dinhmun ṭha mah se a la chiang lo chhunzawm zel a, Watford erawh tla thei dinhmunah an ding.