Quartararo hmaah Bagnaia a thleng

MotoGP world champion Fabio Quartararo hmaah Francesco Bagnaia a thleng a, season hmasa pahnihna hian nikuma a tluk loh hi Spanish Grand Prix 2022 bikah chuan a hneh ta.

Italian tlangval, Ducati bike khalhtu ni bawk hian tun season bika hnehna a chan vawi khatna a ni a, pakhatna leh pahnihna aṭanga bul ṭan Bagnaia leh Quartararo te a tir aṭanga a tawp thleng an in um; tualchhung tlangval Aleix Espargaro chu pathumna a ni thung.

Hnehna changtu Bagnaia chuan, "Tun kar tawp chu engkim a fuh vek. Kan duh leh beisei anga thil a thleng thei ta hi ka lawm, team ṭha dangte el phak turin theihna kan nei tih chu a takin kan lantir," tiin a sawi.

Driver championship table-ah erawh Quartararo chu a sang berah a la awm. Amah hnaih bertu Aleix Espargaro aiin point sarihin a sang zawk, a hmahruaina hi intlansiak pakhata danglam daih thei a la nih avangin fimkhur erawh a la ngai hle.

World champion vawi ruk ni tawh Marc Marquez pawhin hmalam a pan. Hliam vanga hun rei tak buai tawh Marquez hi palinaah a thleng a, hnehna changtu la ni chiah lo mah se a taksa dinhmun chhutin a thlen chin hi a chhe lo.