AC Milan tan match thum chak a la ngai ; UCL khel tur Napoli leh Juventus

Serie A champion ni turin AC Milan tan match thum chiah chak a ngai ta. Kum 2011 hnua a hmasa ber turin league champion nih an beisei mek a, an hmelma Inter Milan aiin point hnihin an sang mek - khelh hmabak pathum an la nei.

Pathianni zan inkhelah AS Roma leh Bologna te goal awm loin an inhnehtawk. Jose Mourinho naute an chak zawh loh avang hian, an chunga awm Juventus leh Napoli te chu season thara Champions League khel turin an tling.

AC Milan leh Inter Milan te UCL khel turin an tling chiang tawh, team dang pahnih Napoli leh Old Lady an tlin leh tak avangin hmunruak pali hnawh khah a ni. Champion tur zawk erawh match tawp ber thlengin ngaihchan a ngaih a rinawm.

Milan beiseina
Champion tur chuan khelh ṭhat loh niah pawh point hmuh theih a pawimawh, harsa tak chung pawha hnehna chan a ngai ṭhin. Tun hnaia AC Milan kal dan hi chutiang chu a ni a, league nomawi chu an kuta awm a ni mek.

San Siro-a inkhelah Milan hian Fiorentina lakah inkhel an thunun thei lo, ball pawh an chang tlem zawk. Goal khung tuma shot nei hnem mah se hlauhawm takin an che thei lo, hun tawp hma minute riat chauh awm tawhah Rafael Leao-a'n khung hlauhin 1-0 in an chak hram.

Serie A mai pawh ni lo European football thlenga team lian, sulhnu nei ṭha bawk ni mah se Milan hian 2011 hnuah league nomawi an la chawi leh lo. Tun season-ah hian an hmelma leh elpui Milan lak aṭanga title an chhuhsak thei a nih lawm a lawmawm zual ang.

Milan an chak hnu lawkah Inter an inlan zui a, an inkara point nga awm chu an sawr zim ve leh nghal. Champion lai hian Ivan Perisic leh Lautaro Martinez te goal hmangin Udinese chu 2-1 in an hneh a, awlsam taka nomawi thlauh mai an tum bik lo.

UCL-ah Juve
Massimiliano Allegri hoa season an ṭan dawn kha chuan, league leh Coppa Italia chauh ni loin Champions League thlenga champion an tum. Tuna an lawmna erawh UCL khelh theihna ticket an neih vang a ni, an duh leh tum angin season an hmang lo.

Roma chak zawk loh niah Juventus hian Venezia 2-1 in an hneh. Old Lady goal pahnih hi defender Leonardo Bonucci khung a ni a, season thara UCL an khelh dawn avangin nipui bazar a awlsam theih phah tura ngaih a ni.

Season hnih an inlan loh hnuah Napoli pawh an lo kir. Diego Maradona club hlui hian hun rei tak chhung chu Serie A champion an beisei a, mahse tun hnaiah an zuih. Champion beisei tawh lo mah se palina nih phak hi lawmna tur a ni tho.

Jose Mourinho erawhin thil ropui a ti nghal thei lo. UCL an khel phak dawn lo a, tuna an tih theih sang ber chu Europa Conference League champion nih a ni, semifinal first leg-ah Leicester City nen 1-1 in an inhnehtawk mek. Ningani zanah Foxes hi an mikhual ang.