Barca-in Mallorca an hneh

Pathianni zan La Liga inkhelah Barcelona-in Mallorca 2-1 in an hneh. Xavi hote hian Nou Camp-a match thum a zawna an chak loh hnuah chak hmel an hmu ta.

Catalan club tan hian Memphis Depay-a'n minute 25-naah goal hmahruai khungin Sergio Busquets-a'n (54') a khung belh. Mikhual team hian minute 79-naah Antonio Raillo hmangin siphurh sut ṭhen mah se Mallorca hian siphurh sutna remchang an nei tawh lo.

Barcelona tan Ansu Fati a rawn kir a, Lionel Messi jersey no. 10 rochuntu hian minute 75-naah Pierre-Emerick Aubameyang a rawn thlak. Kum 19 mi Fati hi kumin January thlaa a inlhiam hnua a inlan lehna hmasa ber a ni a, Barca ṭantuten standing ovation an pe.

Catalan club hian match 34 aṭangin point 66 an hmu a, pahnihnaah awmin an hnuai chiaha awm Sevilla (64 pts) aiin point hnihin an hmu sang zawk. Xavi hote hi season thara Champions League khel turin an dinhmun a ṭha tawh a, season bul an ṭan ṭhat loh an tawp kharna tur hi chhe lo.

Barca hi pahnihnaah an awm a nih chuan TV rights aṭangin euro makatduai 52 an dawng thei dawn a, Champions League an khel pha a nih chuan euro maktaduai 60-70 an dawng leh thei a, Super Copa an khelh theih chuan euro maktaduai riat an nei thei dawn bawk.