Osaka leh Muguruza an tla

Madrid Open aṭangin Naomi Osaka leh Garbine Muguruza te an tla, player pahnih hi second round paltlang zo loin an zinkawng a tawp - an tan clay court chu hmun ṭha a ni thei rih lo a ni.

Osaka hi a khelh ṭhat lai pawhin clay leh grass court-ah a che ṭha ngai lo. Kuminah a sulhnu chhia thaibo tum mah se, a khingpui Sara Sorribes Tormo lakah 6-3, 6-1 in a tlawm. Grand Slam vawi li champion tawh hian vawi ruk ngawt aces siam mah se chak nan a tawk lo.

Spanish nula Tormo-i'n a match hmasa lamah Anastasia Pavlyuchenkova pawh a lo hneh tawh, tun ṭumah pawh hian inrintawkna a nei sang hle. A khingpui service hi vawi nga ngawt a chhuhsak thei a ni.

Japanese nula Osaka chuan, "Match hnuhnung zawk kan khelh ṭum khan ka ke artui a na, tun match atan hian inbuatsaihna nei mah ila duhthusam a ni lo," tiin a chak loh chhan chu 100% fit a nih loh vang niin a sawi.

Inkhel dangah Anhelina Kalinina chuan Muguruza 6-3, 6-0 in a sawp. WTA Finals champion lai Muguruza hi a chawn dinglam a hliam a, a hliam erawh chak loh chhuanlam atan a hmang lo thung.

Player langsar dang Bianca Andreescu chuan Danielle Collins 6-1, 6-1 a hnehin third round a lut a, tleirawl Emma Raducanu pawhin Marta Kostyuk chu 6-2, 6-1 in a hneh ve bawk.