10-1 a tlawm hnuah a êng lam thlir turin fans ngen!

Russian club Rostov chuan Russian Premier League inkhelah 10-1 ngawtin Sochi ngam lo mah se an fan-te chu a êng lam thlir turin an ngen a, goal 10 zet chhuah mah se goalkeeper Denis Popov chu man of the match-ah thlan a ni bawk!

RPL-a palina ni mek Rostov hian Sochi an lenchilh hmain an player paruk chu Covid-19 an kai tih an hre chhuak a, hei vang hian first team player zawng zawng chu khung hran an ngai. 

Sochi lamin inkhelh hun sawn an duh si loh avangin Rostov hian rawlthar rual hruai chungin Sochi an hmachhawn a, 10-1 in an tlawm ta a ni - Rostov hian kum 17 mi Roman Romanov hmangin goal hmahruai an khung a, Romanov hi club tana goal khung thei naupang ber a ni zui. 

Mahse, tawnhriat ngah rual Sochi vuak let Rostov-in an tuar zo lo a, goal 10 ngawt an chhuah - engtin nge goal 10 chhuah chunga keeper Popov hi man of the match a nih theih? tih chu zawhna awm a ni. 

Kum 17 mi goalkeeper hian goal 10 chhuah mah se RPL match khata save ngah ber record a siam tho - vawi 15 zet save a nei a, goal tur a dan zingah penalty a tel. A tawpah chuan man of the match a nih phah. 

Rostov chuan, "Sochi lamin inkhelh hun sawn mai rawtna chu an pawm thei lo. Hei vang hian kum 16-19 inkar kan player-te an khelh a ngai ta a ni. Goal lut zat en chuan a hrehawm a, mahse, kan fan-te chu a êng lam thlir turin kan duh a ni. 

"Denis khan a khel ṭha takzet a, goal hmahruai kan khung te pawh khan min ti hlim takzet. Kan naute khan an theihna zawng zawng an hlan tih min pawmpui ang tih ka ring a, player tin khan an huaisenna leh tumruhna min hmuhtir a ni," an ti. 

RPL pawh hi Covid-19 vangin thla thum zet an chawl tawh a, Sochi leh Rostov inkhel hi league an ṭan leh hnua match hnihna a ni - hemi hnu hian nizan thleng khan match ruk an khel leh tawh.