Football ngainatute men rei zan Real Madrid Vs Manchester City

Zanin dar 12:30 hian Real Madrid-in Santiago Bernabeu-ah Manchester City an mikhual dawn a, Champions League final khel tur a hriat dawn avangin football ngaintute tan hmaih phal chi a ni lo - men rei zan a ni.

Real Madrid hi La Liga-ah an champion tawh a, Manchester City hi Premier League champion lai leh hmahruaitu ni lai an ni thung. Spanish club ṭha ber leh English club ṭha ber inkhel tur hi en a châkawm a, Eithad Stadium-a thil thlen danin en a tichâkawm zual.

Minute 90 Ennawm
Kar liam taa Etihad Stadium-a khelh semifinal first half kha football match ṭha bik a ni a, a hmuhnawm em avangin 'ennawm' ti hialin an sawi. Manchester City-in an mualah an thiamzia an pholang a, passing game mawi an lantir bakah attacking football khelin pressure ṭha takin a pe bawk.

A tawi zawngin Pep Guardiola hoten football duhthusam an khel a, an phu ang ngeiin Kevin De Bruyne, Gabriel Jesus, Phil Foden leh Bernardo Silva ten goal khat ṭheuh an khung. Man City hian goal li khung an phu a, dinhmun ṭha taka din pawh an phu.

Amaherawhchu, Pep-a hote khingpui hi Europe-a record nei ṭha lawrlak Real Madrid an nih miau avangin an duhthusam angin thil a thleng vek lo. Los Blancos-in Karim Benzema an kawl a, French forward hian goal hnih a khung. Goal hnuhnung zawk hi penalty aṭanga a khung niin pressure sangah Benzema-a'n panenka hmangin City keeper chhuanvawr Ederson a bum.

Etihad Stadium-a goal hnih an phurh lai pawha panenka hmanga penalty pet ngam Benzema hi Santiago Bernabeu-ah chuan a tlangnel lehzual dawn. Chutiang bawkin Vinicius Junior-a'n amah chauhin City tlarhnung a pal darh a, first leg-ah 4-3 a nih avangin minute 90 ennawm dang a awm leh ang.

'Sí se puede'
Real Madrid-in kartawp khan player ṭha ṭhenkhat dah ṭha chungin Espanyol 4-0 in an sawp a, La Liga-ah a vawi 35 nan an champion. Los Blancos hian champion lawmin nomawi nen Madrid khawpui an fang a, Plaza de Cibeles kawta mipui pungkhawm au hla chu 'Sí se puede' tih a ni.

Chumi awmzia chu 'kan ti thei' tihna a ni a, Man City laka thawhchhuah an tum hle. Real hian tlarhmaah tun season match 42-a goal 42 khung tawh Benzema an kawl a, French forward hian Champions League-ah goal 14 khung tawhin top scorer a ni mek bawk.

Benzema a awm miau avangin Real tan Man City hneh hi thil theih a ni a, Spanish club phurna belhchhah turin midfielder ṭha Casemiro a rawn kir dawn. Los Blancos hian last 16-ah PSG chu khualmualah 1-0 a an hneh loh hnuin an mualah 3-1 in an hneh let a, Benzema hattrick hmangin Lionel Messi, Neymar leh Kylian Mbappe awmna team an pet tla.

City nge nge
Manchester City tan goal khat a him lo a, chumi piah lamah manager Pep Guardiola hi Jose Mourinho leh Diego Simeone te anga goal venhim ngai pawimawh hmasa a ni ve lo. English champion hian an goal neih sa bakah khung belh turin attacking football an khel ang.

Real hian inhliam vangin defender ṭha David Alaba an chhawr thei dawn lo a, Man City goal bawh na tak dan a harsa sawt dawn. Pep pawhin kerek hliam vangin Kyle Walker chhawr thei dawn lo mah se first leg-a hrem vanga inlan lo Joao Cancelo a rawn kir dawn a, City tlarhnung a phui sawt ang.

Man City hian kartawpa Leeds United 4-0 a an hneh ṭumin Kevin de Bruyne, Bernardo Sivla leh Riyad Mahrez te an hahdamtir a, Real Madrid lakah bul an rawn ṭan ang. Tun hnaiah Gabriel Jesus ke a hmui a, Brazilian forward hi hmatawngah a awm a rinawm.

English club hian quarterfinal-ah Madrid hi an tlawh tawh a, team nem zawk Atletico Madrid lakah an vannei hram. Tun ṭumah chuan Madrid khaw club pahniha ṭha zawk Real Madrid an tlawh dawn a, Man City hi chak chiang sa an ni lo - an buk a rit hret chauh.

Inlan tura beisei
Real Madrid: Courtois; Carvajal, Éder Militão, Nacho, Mendy; Modrić, Casemiro, Kroos; Valverde, Benzema, Vinícius Júnior
Man. City: Ederson; João Cancelo, Rúben Dias, Laporte, Zinchenko; De Bruyne, Rodri, Bernardo Silva; Mahrez, Jesus, Foden

Ka player-te hian hun harsaah an chhia leh ṭha hriatna an hloh lo. First leg-ah khan a tir minute 20 chhung kha chu a har khawp mai. Mahse muang changin kan insiamṭha hret hret a, goal thumin kan chhanglet. Bernabeu-ah kan inkhel dawn a, final thlen theih kan inbeisei. - Carlo Ancelotti, Real Madrid manager

First leg-ah khan thil ṭha tam tak kan ti a, vanduai thlak takin goal kan chhuah a, goal tam zawk khung thei kan ni bawk. Team pahnihin goal nawr kan duh ve ve a, inkhelh kan duh ve ve a, football hmuhnawm thlir tur a awm ang. Real hian kan tlarhnung an tibuai reng a, keini pawhin kan tibuai reng thei tih kan lantir. Man City hi ka chhuang a, Madrid-ah chak tumin kan zin dawn. - Pep Guardiola, Man. City manager