Mizoramin bronze medal la

Khelo India University Games neih laiah - Mizoram University team chuan mipa table tennis huangah bronze medal an vaw chhuak. Semifinal-ah University of Mumbai an hneh loh avangin pathumnaah an lungawi a ngai.

MZU aiawh hian Hrangbana Collage (HBC) zirlai Jeho Himnakulhpuingheta, Alberto LR Ruata, John Zamliana leh Lalruatsanga te an feh chhuak a, manager Saugata Sarkar chuan a kaihruai a ni.

Bangalore, Karna-taka-a inelna neihah MZU team hian - Punjabi University, Patiala (2-3) leh University of Pune (3-2) te hnehin quarterfinal an lut. A thiam pariat inelnaah hian Maharaja Krishnakumarsinhji Bhavnagar University chu 3-0 in an hneh.

Beiseina sang tak nei mah se, team ṭha University Of Mumbai lakah erawh an ṭang zo lo, 3-2 in a vanduai zawkah an ṭang. An tum ram thleng chiah lo mah se, medal erawh an hlawh chhuak ta tho a ni.

Kum bithliah hrang hranga India number 1 ni tawh Jeho-a chuan, "Tournament aṭangin thil tam tak kan zir chhuak a, a bik takin hmasawn kan ngaihna kan zir chhuak. Hneh loh nei loin semifinal kan thleng thei hial.

"Mahse, a tawpah erawh bronze medal chu kan chan theih sang a ni. Rilru paukhauh lehzual a ngai hle, inelna kan hmachawn leh hunah chuan result ṭha zawk kan neih theih ka beisei," tiin Vanglaini a hrilh.