Man United-ah besei tur a la awm

Manchester United tan Champions League beisei ngam chi a ni tawh lo a, chutihrualin Thawhṭanni zana Brentford laka an khelh dan thlir chuan chhe lailet dêr an la ni lo. Ralf Rangnick-a hote hian Bees hi 3-0 in an sawp a, German manager hnuaia an chak chian ber ṭum a ni.

Old Trafford-a inkhelah hian Bruno Fernandes, Cristiano Ronaldo leh Raphael Varane ten goal khat ṭheuh an khung a, football hmuhnawm an pholang bawk. United hian match 36 aṭangin point 58 an hmu a, match hnih chiah khelh tur nei tawhin Europa League khel turin an dinhmun a ṭha.

Beisei tur a tlem
Manchester United hian March thla laihawl khan Old Trafford-ah Atletico Madrid 1-0 in an hneh lo a, Champions League aṭangin an tla. Premier League-ah che chhe zuiin Man United hian an mualah Leicester City nen 1-1 in an inhnehtawk a, Goodison Park-ah club kal sual lakloh Everton chu 1-0 in an hneh lo zui bawk.

Rangnick-a hote hian point hloh reng mah se Champions League beiseina erawh an chhi nung ve zel a, Ronaldo hattrick hmangin Norwich City chu 3-2 in an hneh hram. Man United hian Canaries lakah point thum hlawh chhuak mah se Liverpool hmachhawn tur chuan an inpeih lo a, Anfield-ah 4-0 in an mualpho a, Emirates Stadium-ah Arsenal 3-1 in an hneh lo zui bawk.

United hian elpui ber Gunners an hneh loh avangin Champions League beiseina a thamral ti tih a, Old Trafford-ah Chelsea nen 1-1 in inhnehtawk mah se an dinhmun a ṭhat phah lo. Blues lakah point khat hlu tak an hlawh chhuak nachungin mual chhungah erawh an inthlau deuh. Season ṭantirha champion inbeisei Man United ṭantute tan beisei tur a tlem hle.

Beiseina thar chu
Man United-in Reds an hneh loh zawhah season thar aṭanga manager turin Erik Ten Hag an lakluh thu an puang a, beiseina thar a awm. Dutch manager kaihhruai tur player-te pawhin theihna an nei tih Bees lakah an pholang a, United ṭantute tan lawmna tur a awm leh ta.

Brentford lakah Man United-in nung takin inkhel bul an ṭan a, Diogo Dalot-a ball vawrhluh chu Ronaldo-a'n a volley goal nghal teuh hle. Goal erawh nghah rei a ngai lo, minute kuanaah Dalot-a ball vawrhluh bawk chu Anthony Elanga-a'n um lutin ṭha zetin a cross a, Fernandes-a'n goal hmahruai khung nan a hmang.

Ronaldo leh veteran midfielder Juan Mata an hmuhnawm a, Spanish midfielder hian Ronaldo siamsak chu goal-ah chantir teuh hle. Portuguese forward erawh Mata cross mawi zet chu goal-ah a chantir thung a, amaherawhchu VAR hmanga en let hnuah offside vangin pawm a ni lo.

Second half-ah pawh United bawk an chungnung a, Nemanja Matic-a ball fing chu Fernandes-a'n goal zawnah a pet thei lo. Ronaldo-a'n minute 61-naah penalty a hlawh chhuak a, chiang zetin a khung zui. Arsenal lakah Fernandes-a'n penalty a pet goal lo a, Bees laka Ronaldo pet dan thlirin United tana penalty pet chhunzawm tur zawk chu a chiangah a ngaih theih.

Minute 72-naah Alex Telles-a corner pet chu Varane-a'n goal-ah a chantir a, Old Trafford-ah United ṭantute thawm a ṭha hle. Goal dang a luh belh tawh lo a, Man United-in tun season-a an muala an khelh hnuhnun berah 3-0 in hnehna an chang.

Rangnick a lawm lo
Brentford lakah Man United khel ṭha mah se tun season-a an khelh dan thlir erawh chuan lawmna tur a awm lo. Man United manager lailawk Ralf Rangnick chuan, "A tawpah chuan lawmna tur ka hmu lo. A bik takin tun hnai kar li chhunga kan khelh danah ka lawm lo. Chutihrualin player inhliam kan ngah ve bawk.

"January 22-a West Ham kan hneh zawh khan player pathum kan inhliam, team dang chuan January transfer-ah player thar an lalut bawk. Khelh ṭhat ṭum kan nei a, goal pawh kan chhuah tlem. Tun hnaiah erawh kan khel chhe takzet a, kan khelh dan a nghelnghet lo a ni," tiin tun hnaiah an khelh danah a lungawi loh thu a sawi.

Kum 63 mi Rangnick hian Austria manager hna a chelh dawn a, Manchester United-ah thurawn petu a ni chhunzawm bawk dawn. German manager chuan sawi chhunzawmin, "Tun dinhmunah chuan Erik nen kan la inbe mumal thei lo. Dutch league-a champion ngei tumin hma a la a, keini lamin kan inkhel turah rilru kan pek a ṭul bawk.

"Club dang chuan transfer-ah pathum vel lek an lak chuan champion an beisei ngam mai dawn a, keini erawhin player ṭha bik kan lak a ṭul dawn. Kan duh ang kan lak fuh theih chuan team ṭha zinga tel turin hun rei kan nghah a ṭul lo ang. Player ṭhenkhat hi an chhuah dawn avangin player ṭha lakluh hi kan mamawh a ni," tiin a sawi.

Brentford lakah hian kum 34 mi Mata leh kum 33 mi Matic te an inlan a, midfielder ṭha ṭhin pahnih hi season tawpa an contract zawh hunah an chhuak ang. Kum 29 mi Paul Pogba pawhin contract a hmang zo dawn a, French midfielder hi chhuak ngei tura ngaih a ni bawk.