CYMA Cricket Luangmualin quarterfinal an lut

Central YMA leh Cricket Association of Mizoram buatsaih 11th Inter Branch Cricket Tournament chu nimin khan khelh chhunzawm a ni a, match hnih awm tur ni mah se ruahsur vangin match khat chauh khelh a ni. Seeded team zinga mi Luangmual chuan Zemabawk East lakah wicket hnihin hnehna an chang hram.

Zemabawk East hian bat hmasain J. Biakthanpuia'n 44 runs a siam zarah 147 runs an siam a, chakpui tham a tling. Luangmual-in over tawp berah chak turin six runs siam a ngai a, wicket riat an hloh tawh avangin Zemabawk East dinhmun a ṭha zawk.

Amaherawhchu pressure sangah Zemabawk East an talbuai a, 'batter specialist' an awm tawh lo chungin boundary an veng a, Luangmualin run siam keuh keuhin ball tawp berah hnehna an chang.

Nimina inkhel tur hnuhnung zawk Chaltlang leh Tuikual South te chu ruahsur vanga an inkhelh theih loh avangin vawiin chawhnu dar 1:00 hian Ramhlun Sports Complex-ah an inkhel ang. Vawiin hian last 16 match ruk khelh tur a awm dawn a ni.