Wimbledon thlawp lotu player an langsar

All England Lawn Tennis Club (AELTC) leh Wimbledon thutlukna thlawp lotu an tam a, mipa leh hmeichhe player langsar chinah a thlawp zawnga ṭawngkam nei an la awm lo - thlawp lotu erawh an hrawl hle thung.

Rafael Nadal-a'n tun hnai khan a ngaihdan a sawi chhuak ve a, grass court inelna liana Russian leh Belarus player inkhel thei ve lo tura hrem an ni chu a pawm thei lo - world number 1 Novak Djokovic chuan a vawi hnih nan a thlawp loh thu a sawi bawk.

Tualchhung tlangval, British mi ten an ngainat em em Andy Murray pawhin a thlawp chuang lo. Pawi sawi lotu inkhel thei loa hrem ringawt chu buaina chinfel dan a nih loh thu a sawi ve bawk, midang pawh an la ṭawng chhuak chhunzawm zelin a rinawm.

Buaina chu
Russia leh Ukraine an buai a, an inkarah tharum thawhna hial a chhuah tak avangin ram hrang hrangin Russia hi an hrek. Infiamna huangah pawh hrek an ni tho a, ram leh ram inelna angah chuan an tel thei lo deuh vek.

Tennis ngei pawhin Russia hi ram leh ram inelnaah chuan tel an remti lo, mahse player mal erawh an duhna hmuna an khelh an phalsak vek thung - an ram hming an pu lo a, neutral athlete an ni mai. An duh chuan United States-ah pawh an inkhelh an phal.

Ram pahnih inkara buaina a puak chhuah aṭangin, ram hrang hrang chuan Russian tennis player-te chu an rama inkhelh an la phal vek. Mahse, United Kingdom sorkar erawhin ngaihdan danglam a nei, an ramah chuan an phal ve dawn lo.

A tirah chuan Russian player-te chu an ram president Vladimir Putin an thlawp lo a ni tih an sawi chuan an inkhel thei ang, tih a ni. Mahse, April thla chawhnu lamah thuchhuah an siam, an tan kawng an hawnsak duh ta lo zawk a ni.

Murray ngaihdan
Andy Murray hi British mite ngaihsan rawn a ni. Wimbledon champion vawi hnih a nih hnu khan, pasalṭha leh hmingṭha chawimawina 'Sir' nihna pawh an pe hial. An tlangval chhuanvawr hian Wimbledon thutlukna erawh a thlawp lo.

World number 1 hlui Murray chuan, "Inkhel thei loa player hrek hi kei chuan ka thlawp lo. Sorkar thutlukna hi thil ṭha niah ka ngai lem lo. Indona hi thil ṭha lo leh nghawng ṭha lo tak nei chu a nei ngei mai.

"Mahse, tuna hmalak dan hi chu buaina chinfelna a ni lo, player-te hian indo hi an thlawp a ni bik bawk si lo. Chutihrualin Wimbledon tana thawktu leh sorkar thuneitu lam dinhmun pawh kan ngaihtuah tel a ngai ve bawk," a ti.

Murray hi Madrid Open-ah a inlan a, a match hmasa berah Dominic Thiem chu 6-3, 6-4 a hnehin second round a inhlangkai. Thiem hi hliam vanga rei tak chawl a ni a, tun hnaiah rawn kir mah se beisei a la phak lo.

Nadal a ṭawng
Rafael Nadal hian tennis court pawn lamah thu a sawi tam lo, a bik takin pawl leh mimal thutlukna phei chu a sawi ngai meuh lo. Wimbledon chungchang erawh zawhna a dawng miau a, huaisen takin a ngaihdan a sawi chhuak.

Spanish star Nadal chuan, "Ka player pui inkhel thei lo tura hrem an ni hi a mak ka ti, rorelna lai lo tak a ni. Indona hi tennis player vanga thleng a ni lo, an chunga hetiang a thleng hi pawi ka ti hle.

"Wimbledon lamin thu an titlu tawh a, tih danglam leh theihna hun erawh a la awm. Kan lo ngaichang reng dawn a ni," a ti. Nadal hi grass court-a inkhel thiam lo tia sawi a ni ṭhin, mahse Wimbledon title pahnih a nei tawh - pakhat lak pawh intihtheihna tham a ni si.

Grass court inelna lian hi June 27 aṭangin All England Club-ah khelh a ni dawn, tournament ṭan hmain thil tam tak a la thleng hman dawn. Tun dinhmunah erawh AELTC lamin an thutlukna tih danglam an la tum lem lo.

Novak a bang lo
Mahni thu duh, luhlul leh mahni ngaihdan huaisen taka sawi chhuak mi a ni a, tunah pawh Novak Djokovic a ṭawng chhuak leh ta. April thla pawh khan Novak hian Wimbledon hi a lo sawisel tawh bawk.

Wimbledon champion lai Djokovic chuan, "Tun season tir lam khan tennis court pawn lama buaina leh harsatna ka lo tawk tawh, a hrehawmzia ka hrechiang viau. Chuvangin keimah ang bawka tennis player dangin pawn lama buaina an neih ka duh lo.

"A tira ka sawi nghal ang khan, kei chuan Wimbledon thutlukna hi ka pawm ve thei lo. Thil dik niin ka hre lo a, buaina chinfelna a nih loh avangin a ṭha ka ti lo," tiin a sawi a, infiamna leh politics chawhpawlh a duh lo a ni.

Serbian star hian hripui laka invenna a lak duh loh avangin Australian Open a khel thei lo a, a hnuah US lamah a inkhel thei lo bawk. Tunah erawh clay court season a hmang ṭan a, tun kar aṭanga khelh ṭan Madrid Open-ah a inlan ang.

No War Please
Russia leh Ukraine an buai tirh khan, Russian tennis player Andrey Rublev chuan TV camera hmaah 'No War Please' tih a lo ziak tawh a, ram leh ram tharum hmanga indona chu a thlawp lo, mahse tunah chuan Wimbledon khel thei lo tura hrem zingah a tel.

World number 8 Rublev chuan, "Chi inthlirna dik tak a ni," tiin a sawi a, Russian player bakah Belarus player ten hrem an nihna a pawm thiam lo. Hmeichhe world number 20 Elina Svitolina pawh a lo ṭawng chhuak ve tawh bawk.

Hremna hi an kaltlangpui a nih chuan, mipa world number 2 Daniil Medvedev chu inlan thei lo tur langsar ber a ni ang. Kum 26 mi Medvedev hian season tir lam khan world number 1 dinhmun te a lo hauh zak zak tawh, a vanglai taka Grand Slam khelh loh chu a uiawm dawn.

Mipa tennis thuneitu sang Association of Tennis Professionals (ATP) leh, hmeichhe lam thuneitu Women's Tennis Association (WTA) pawhin inelna khel tur chu hnam bil ni loin, ranking point hmanga thlan an duh thu an sawi - Wimbledon thutlukna hi an sut a nih pawhin a mak lo ang.