Luton Town sawptu Fulham an champion

Championship lamah nomawi chawitu a chiang ta - Fulham chuan Thawhṭanni zan khan an mikhual Luton Town chu 7-0 in an sawp a, Championship-ah nomawi an chawi.

Fulham tan Aleksandar Mitrovic chuan goal hnih a khung a, tun season-a league match 43 a khelh aṭanga goal 43 a khungna chiah a ni - Premier League-in a lo hmuak e!

Cottagers (Fulham sawina) tan hian Tom Cairney, Kenny Tete, Fabio Carvalho, Bobby Decordova-Reid leh Jean-Michael Seri te chuan goal khat ṭheuh an khung bawk a, Luton an mualpho.

Luton tan tun season-a an tlawm chian ber ṭum a ni a, table-ah paruknaah an tla thla bawk - match khat chiah khelh tur awm tawhah pasarihna Middlesbrough aiin point hnihin an hniam a, playoff khel tura an dinhmun a derthawng ṭan.

A tawpah
Fulham-in season tharah Premier League an khel dawn tih a chianna a rei tawh a, April 30-a Preston North End (3-0) an hneh khan season tharah English top flight league an khel dawn tih a chiang tawh.

Mahse, Fulham-in an league nomawi erawh an tichiang lawk thei lo - Preston an hneh hnua match hnih an khelhah point khat chiah an nei a, an thla a muang ta mah mah niin a lang hman.

Thawhṭanni zanah erawh Fulham-in thawnthu an her danglam a, goal sarih ngawt an khung. Liverpool player beiseiawm ber pawl ni ṭhin Harry Wilson chuan minute 29-naah Cairney tan a siamsak a, kum 31 mi midfielder hian goal-ah a chantir.

Watford boss hlui Marco Silva enkawl Fulham-in an duhtawk mai lo. Minute 39-naah Tete chuan a hman thiam loh lam, a ke veilamin mawi zetin goal-ah a chhuih lut a, chak tur a chiang tawh tiin a sawi theih.

Goal a sur!
Fulham-in 2-0 a hma hruai chungin chawlhlawk an hmang a, an la duhtawk reng reng lo - minute 54-naah Wilson chuan season thara Liverpool pan tura sawi Fabio Carvalho tan a siamsak a, Carvalho hian an goal thumna a khung.

Khualmualah Luton an che hleithei lo a, Fulham erawhin goal an khung tui laklawh. Minute 62-naah Mitrovic chuan a khung ve leh a, tun season-a league goal 42 a khungna a ni.

Decordova-Reid leh Jean-Michael Seri ten ṭhiante goal khung lawma au reng rikngawt bik an duh lo tih an pholang ve leh a, minute 65-na leh 79-naah an khung belh a, 6-0 a ni!

Fulham an phur laklawh - tun season-a ke hmui em em mai Mitrovic chuan hun pek belhah a goal hnihna a khung leh a, hun tawp thlenga goal dang lut loin 7-0 in an chak.

A hming Mitrovic
Kum 27 mi Mitrovic-a'n tun season-ah league match 43 khelin goal 43 a khung ta der a, Championship-ah season khata heti zat goal khung thei an la awm ngai lo.

English striker Guy Whittingham chuan 1992-93 season khan Portsmouth tan league season khatah goal 42 a lo khung tawh a, rei tak he record khum thei an awm loh hnuah Mitrovic-a'n a khum ta.

Serbia tan vawi 71 inlana goal 44 khung thei Mitrovic hi Premier League-ah a mikhual hran lo. Mahse, season hmasa an tlak dawn khan league match vawi 27 a khelhah goal thum chiah a khung thei!

Season tharah Fulham hi Premier League team vantlang pawla hlan kai a duh a nih chuan Championship ang thoa goal khung uar a ṭul dawn a, mahse, kum 1992 hnua English league-a goal khung hnem ber tan pawh Premier League a nih tawh miau avangin a awlsam lo ang.

Liverpool fapa
Harry Wilson-a'n Liverpool fans tam tak lung tileng mah se Jurgen Klopp-a mit a tlung tlat lo a, season ṭan dawn khan Fulham lamah loan-a khel tura chhuahtir a ni.

Wales international hian Luton lakah assist vawi thum a nei a, tun season inelna hrang hranga match 43 a khelh aṭanga assist vawi 21 a neihna a ni a, goal 11 a khung bawk.

Wilson hian April thla tawp lam khan pound maktaduai 12-a Fulham hi a ngheta a zawm tur thu a tichiang tawh. Kum li atan contract a ziak a, kum khat dang pawhsei theih a ni.

Hetihlai hian goal khungtu zinga mi Carvalho kha nipui transfer-a Anfield pan tura sawi a ni bawk a, tun season inelna hrang hrangah match 37 khelin goal 11 leh assist pariat a nei a, kum 19 mi lek a la ni bawk!

Luton beiseina
Fulham laka Luton an tlawm avangin Championship boruak a 'hot' tual tual - Premier League khel turin Fulham an tling chiang tawh a, a dang pahnih a la chiang lo.

Pahnihna Bournemouth leh pathumna Nottingham Forest ten match hnih ve ve khelh tur an la nei a, an inkarah point thum chauh a awm tawh - Nizan khan team pahnih an intawng a, result kan hre hman lo. Pahnihna ni chunga season khar zawkin automatic-in Premier League an khel dawn.

Pathumna aṭanga paruknain playoff an khel dawn a, Huddersfield Town-in point 79 nei mah se goal difference aṭanga enin thil mak a thleng a nih loh chuan pahnihna an ni thei tawh lo.

Match khat chiah khelh tur nei tawh, pangana Sheffield United leh parukna Luton hian point 72 ve ve an nei a, an hnuaiah point 70 nei Middlesbrough an awm - Boro-in playoff khelh an la beisei a, Championship match tawp khelh hunah boruak a 'hot' dawn.