Suns leh Heat an chak hmasa

Phoenix Suns leh Miami Heat ten nimin khan conference semifinal an khel a, an khingpui ve ve hnehin best of seven series-ah 1-0 in hma an hruai. Anmahni conference final lut turin an dinhmun an siamṭha.

Western Conference semifinal-ah Suns hian Dallas Mavericks chu 121-114 in an hneh. Hnehna an chan theih nan Deandre Ayton-a'n point 25 a nei a, thlawptu Devin Booker (23 points) a khel ṭha bawk.

Dallas tan Luka Doncic-a'n point 45 tehmeuh a nei, amaherawhchu a ṭhiante zingah point 20 nei tling thei an awm ve lo. Suns erawh an player paruk ngawtin point 10 chuang an nei, mimal khel ṭha aiin team thawhhona ṭha a dingchang.

May 5, Ningani zing dar 7:30-ah semifinal game 2 an khel dawn. Best of seven series a nih avangin, conference final lut tur chuan a tlem berah vawi li tal an chak a ngai, match hmasa bera chak lo zawk Dallas tan pawh kawng a la inhawng zau hle.

Eastern Conference semifinal game 1-ah Philadelphia 76ers an chak lo. An player pawimawh Joel Embii an chhawr theih loh an tuar a, an khingpui Miami Heat lakah 106-92 in a chak lo zawkah an ṭang.

Heat player Tyler Herro-a'n point 25 a nei a, ani bakah midang paliin point 10 chuang an nei bawk. Chawlhlawk an hman laiin 51-50 in hniam mah se, inkhel chawhnu lam bikah 56-41 in an chungnung a, belh khawmah an sang zawk.

Sixers coach Doc Rivers chuan, "Tihsual tlemte kan nei, chumi chu kan tuar. Khualmuala khel ni mah ila kan ti chhe hran loah ka ngai, match lehpekah chuan hnehna kan chan theih tawh ka beisei," tiin a sawi.

NBA Playoff
Western Conference Semifinal
Game 1: Phoenix Suns 121 - 114 Dallas Mavericks
(Suns hian series-ah 1-0 in hma an hruai)
May 5, Ningani
Game 2: Phoenix Suns 07:30 AM Dallas Mavericks

Eastern Conference Semifinal
Game 1: Miami Heat 106 - 92 Philadelphia 76ers
(Philadelphia 76ers hian series-ah 1-0 in hma an hruai)
May 5, Ningani
Game 2: Miami Heat 05:00 AM Philadelphia 76ers
Note: Inelna hi best of seven series hmanga khelh a ni, tlang turin vawi li chak a ngai.