Gauff hnehtu Halep a tlang

Simona Halep chuan inelna bul a ṭan fuh a chhawm nung zel. Thawhṭanni zan inkhelah Romanian star hian Coco Gauff 6-4, 6-4 in a hneh a, harsatna lian tham tawk loin Madrid Open quarterfinal a lut.

Madrid Open vawi hnih champion tawh Halep hi tun hnaiah a inkhel tam lo, hliam vangin a chawl rei hle. Tun ṭumah hian seeded ni phak lo mah se midang tana zuam sual theih a la ni, a match hmasa zawkah seeded pahnihna Paula Badosa a hneh tawh bawk.

Kum 30 mi Halep hian a match lehpekah chuan Ons Jabeur a tum dawn, inkhel dangah Jabeur hian Belinda Bencic 6-2, 3-6, 6-3 in a lo hneh ve thung a, ruah surin a tihbuai inkhela vannei zawk a ni.

Grand Slam vawi hnih champion tawh Halep chuan, "Ka duh ang takin ka khel thei, set hnihnaah khan Gauff-i'n a match kalhmang a rawn ti danglam, chumi hmachhawn thei tura ka insiamrem leh nghal thei kha a lawmawm zual," a ti.

American tleirawl Gauff hian Halep hi vawi thum a hmachhawn tawh a, a la ngam lo vek.