Real Betis chak zo lo

Copa del Rey champion Real Betis-in season thara Champions League khelh an tumna kawngah harsatna an tawk a, khualmualah Getafe nen 0-0 in an inhnehtawk.

Betis hi table-ah pangana an ni mek a, palina Atletico Madrid chu point thumin an phak lo mek - match li khelh tur a la awm a, beisei a la bo lo.

Real Betis hi Getafe lakah an vannei tawk lo. Manchester City boss hlui Manuel Pellegrini enkawl team hian ball pawh 66% lai an chang a, mahse, a pawimawh ber goal an ken tel loh avangin draw result-ah lungawi an zir.

Betis tan hian German Pezzella leh Nabil Fekir ten chance nei mah se an chhawr thei lo a, season thara Champions League khel turin an thawhrim lehzual a ngai dawn.

Real Betis hian Inrinni zanah an elpui Barcelona an mikhual zui dawn a, Valencia leh champion Real Madrid an la hmachhawn dawn bawk!

Mahse, Betis midfielder Sergio Canales a zam lo. Tun season-a goal sarih leh assist vawi 10 nei tawh Canales chuan, "Top four hi point thumin kan phak lo mek a, mahse, a sang pali zinga awm hi kan tum ber chu a ni," a ti.

Canales chuan, "Barcelona khelmualah kan leng dawn a, kan duhdan anga engkim a thlen kan beisei - kan tan chuan final a ni," a ti zui a, Catalan club tan ngaihthlak a nuam lo ang.

Hetihlai hian Betis chelhtu Getafe tan erawh result hi lawmawm a tling a, season tharah La Liga an khelh chhunzawm ngei a rinawm tawh - table-ah 15-na an ni mek a, relegation zone china awm, 18-na Getafe aiin point ngain an sang mek.