Anfield-ah 2-0 in an chak a, Spain-ah minute 41 chhungin goal hnih an chhuah thung - chu chu Liverpool chanchin a ni a, Champions League final lut chiang tawha tam takin an ngaih team kha thawklehkhatah an nghing ta thut!
Liverpool hian Champions League semifinal first leg-ah awlsam takin Villarreal an hneh a, football fans tam takin, "Chak tur a chiang," tiin an mutsan a, Villarreal tan danglamna thlen theih a nih an ring lo. Mahse, Villarreal hian first half chhungin Boulaye Dia leh Francis Coquelin hmangin goal an rawn khung a, Reds ṭantute an hlauthawng hman. 
Liverpool ropuina leh danglamna erawh an hnual ve ngai lo hi a ni - second half-ah Fabinho, Luis Diaz leh Sadio Mane ten goal an rawn khung a, a tira nghing team kha nuamsa takin an chak. 
Jurgen Klopp-a enkawl team hian inkhel hmasa nena belhkhawmin 5-2 in hnehna an chang a, Champions League semifinal an lut - nomawi pali chawi beiseina a nung zel e. 
An tuar dawn Anfield-ah Villarreal an mualpho a, mahse, Juventus leh Bayern Munich pet chhuak theitu an ni a, coach Unai Emery a zam lo. Spanish coach hian an mualah inkhel a danglam tur thu a sawi a, Liverpool chu 'tuar tura inpeih' turin a ti!

Klopp pawh a ṭawng fimkhur. German coach hian Villarreal thapui thawh dawl zo tura inbuatsaih turin a naute a fuih a, mahse, first half-ah Emery-a thusawi a thleng dik a, Reds player-te erawh Coach fuihna tel loa khel ang mai an ni. 
Inkhel ṭan aṭanga minute thumna lekah Villarreal-in goal an khung nghal. Anfield-a Jordan Henderson ball cross dang luttu Pervis Estupinan chuan ball a cross a, hemi lo changtu Watford midfielder hlui Etienne Capoue chuan Boulaye Dia tan a siamsak a, a goal chiang. 
Reds tlarhnungin an tih tur an ti tawk lo tiin a sawi theih a, an pherh takzet. Liverpool-in na takin an nawr let dawn emaw tih laiin beisei an phak lo zui - ball an in pass dik thei lo a, kil tinah tihsual an nei em ni chu aw, tih mai tur a ni. 
A vawi hnihna Villarreal-in goal an khung hma chuan beisei tur an nei tih an hria a, Estadio de la Cerámica-a kawr eng nena khat tlat an fan-te puihna nen European football-a team ṭha ber pawl an hlau lo. 

Spanish club hian minute 41-naah an phu ang ngeiin goal an hlawh chhuak leh a, Arsenal midfielder hlui Francis Coquelin chuan an goal hnihna a khung - Capoue siamsak bawk a ni. 
Villarreal-in chawlhlawk hmain goal hnih an khung hman a, rei loteah dinhmun ṭha zawk an ni - goal khung zat a inang a, mahni mualah fans tam tak puihna nen an inkhel bawk. 
Virgil van Dijk hoin tlarhnungah Liverpool an hawihai a, tlarhma lamah Mohamed Salah, Sadio Mane leh Diogo Jota te an hlauhawm tawk lo bawk - first half chhungin target-ah shot an nei miah lo!
A hunah tak Tun season-a Liverpool danglamna chu an tlawm dawn emaw tih hnuah pawh an 'comeback' ṭhin chu a ni a, hlauhthawnna karah pawh Reds fan-ten beiseina an nei tlat.

Klopp-a'n beisei phak lo Jota la chhuakin, player nung ṭha tak Diaz a luhtir a, Reds inkhel a nung sawt - Liverpool tak tak kan hmu leh ṭan a, goal hmu tur pawhin nghah rei a ngai lo. 
Minute 62-naah Salah-a siamsak chu Fabinho chuan goal-ah a khung a, a kap kara chhuahtu Villarreal goalkeeper Geronimo Rulli-a'n a hna a tlin tawk lo tiin a sawi theih. 
Liverpool an phur laklawh. Minute 67-naah Diaz-a hun a her chhuak a, Trent Alexander-Arnold-a cross chu ṭha zetin a tauh lut; 2-2 a ni a, Liverpool fan-te thlamuangin an awm ve leh ta!
Hello quadruple Liverpool-in si phurh an sut zo a, inkhel hmasa nena belhkhawmin 4-2 a ni tawh. Mahse, duhtawk mai an la tum lo. Minute 74-naah Naby Keita siamsak chu Mane-a'n a um lut a, ṭul lo takin Villarreal keeper Rulli a tlan chhuak. 

Rulli hian Mane ball tawh fuh hmain ball a khawih hman leh si lo a, a chesual - Senegalese forward hian goal ruakah a khung a, 3-2 in Liverpool an chak a, inkhel pahnih belhkhawmah 5-2 a ni. 
League Cup champion Reds-in hnehna an chan avangin Champions League final an khel dawn a, FA Cup-ah final an luh bawk avangin inelna an hmachhawna match zawng zawng an khel vek dawn tihna a ni bawk. 
Liverpool hian Premier League-a match li khelh tur la awmah point khatin hmahruaitu Manchester City an phak lo mek a, City an lehpel a, FA Cup leh Champions League final-ah an chak a nih bawk chuan English club zinga quadruple champion hmasa ber an ni ang.
Inkhel Chhehvel •	English club zingah season khata European Cup/Champions League, FA Cup leh League Cup final lut vek thei awmchhun chu Liverpool an ni. •	Liverpool-in a vawi 10 nan European Cup/Champions League final an lut a, anni aia lut tam chu Real Madrid (16), Bayern Munich (11) leh AC Milan (11) te chiah an ni. •	Jurgen Klopp-a'n a vawi li nan Champions League final a lut a, Sir Alex Ferguson, Carlo Ancelotti leh Marcello Lippi te nen final lut ngun ber an ni. •	Sadio Mane-a'n Champions League knockout stage-ah goal 15 a khung tling ta a, English club tana CL knockout match-a goal khung tam lamah Chelsea midfielder Frank Lampard a tluk chiah. •	Trent Alexander-Arnold-a'n tun season inelna hrang hrangah assist vawi 18 a nei ta a, European top five league (England, France, Germany, Italy & Spain) player zingah Thomas Muller (21) leh Kylian Mbappe (19) chu assist ngah lama a tluk loh mek an ni.
Champions League Semifinal First Leg April 26, Thawhlehni Zan Manchester City	4 - 3	Real Madrid MAC: Kevin de Bruyne 2'; Gabriel Jesus 11', Phil Foden 53'; Bernardo Silva 74' REA: Karim Benzema 33', 82' (P); Vinícius Júnior 55' April 27, Nilaini Zan Liverpool	2 - 0	Villarreal LIV: Pervis Estupinan 53'; Sadio Mane 55' Second Leg May 3, Thawhlehni Zan Villarreal	2 - 3	Liverpool VIL: Boulaye Dia 3'; Francis Coquelin 41' LIV: Fabinho 62'; Luis Diaz 67'; Sadio Mane 74' *Inkhel pahnih belhkhawmah 5-2 in Liverpool an chak May 5, Nilaini Zan (Result kan hre hman lo) Real Madrid	12:30 AM	Manchester City
Chawlhlawka kan buaina chu kan tihsual kan hria a, mahse, kan tih ṭhat lai sawi tur kan hre lo kha a ni. Assistant coach Peter Krawietz hnenah khan kan tih dik lo en turin ka ti a, mahse, a rawn kal a, first half chhunga kan tih dik hmuh tur a neih loh thu min hrilh!&nbsp;Kan khel ṭha tawk lo a, a pawimawh ber erawh kan nauten an beih let dan kha a ni - chi ai hauh loin kan awm a, helai hmunah hian kan la awm phah a nih hi. First half-ah kha chuan football kan khel lo. Chawlhlawkah khan, "Tunah hian Villarreal dinhmun a ṭha zawk a, mahse, kan chhuhsak thei a ni," tiin ka naute ka fuih. Thawklehkhatah ṭha takin kan khel a, goal kan khung a, a thlen tur angin thil kan thlentir zui a ni ber.&nbsp;Ka naute bulah khan football bak sawi ka nei lo - kan khelhna tur, kan tlanna tur, kan huaisenna tur leh thil kal tluang lai thlak a ngaih thu thlengin ka sawi a, kan buaina kha football a nih avangin football thoa chinfel a ngai tlat a ni.&nbsp;Goal kan chhuah hnu khan kan rilru a buai nghal a, kan hmanhmawh hret a, pressure kan zo lo bawk. A pawimawh ber chu kan khelh dan anga khelhchhuah a ni a, chu chu second half-ah kan ti a ni.&nbsp;- Jurgen Klopp, Liverpool manager Kan kaltluang lai kan talbuai a, a pawi a ni. Juventus leh Bayern Munich laka kan khelh dan te, Liverpool laka kan tih ṭhatte thlirin lawm a harsa a, mahse, Reds hian final khelh an phu a ni. First half-ah khan team ṭha kan nihzia leh chance nei ve thei kan nihzia kan pholang a, mahse, match hniha result thlak danglam thei zawk erawh Liverpool an ni.&nbsp;- Unai Emery, Villarreal boss