Futsal League-ah Electric Veng an êng ber

Kuriz Collection MFA Futsal League final-ah Electric Veng FC leh Chanmari Zothan Futsal chu hun pangngaiah 2-2 in an inhnehtawk. Extra time-ah Electric Vengin goal hnih khung belhin 4-2 in hnehna an chang a, Mizoram chhung futsal inelna sang berah an champion.

Thawhlehni zana final hmuhnawm takah hian Electric Veng keeper Lalrinzuala chu man of the match-ah thlan a ni a, champion-na kawnga player pawimawh VL Rindika chu best player atan thlan a ni. Inelna hmasa pahnih champion Chanmari Zothan Futsal erawh a lungthu kim nan an champion thei lo a, fair play award an dawng thung.

Mipui puihna
MFA Futsal League season hmasa pahnihah Lalluaii Electric Veng tiin an tel a, tun ṭuma mi erawh Electric Veng FC niin vengchhung club a ni a, vengchhung player chauh an tel. Tun hma aṭanga entu nei ṭha ṭhin Electric Vengin season dang aiin ṭantu an nei ṭha a, team an inpuahchah ṭha a, a rahchhuah chu result ṭha a ni.

Electric Veng hian group match sarihah Saron Veng (4-6) chiah an hneh lo a, a bakah match rukah Whetstone FC (4-2), Ramhlun South FC (6-2), Chhinga Veng FC (5-1), FC Khatla (6-5), Lawmna FC Dinthar (5-3) leh Amawii Bawngkawn FC (5-2) an hneh vek. Quarterfinal-ah Electric Veng hian Zonuam (5-4) a hnehin semifinal-ah league round-a an hneh tawh Lawmna FC chu 5-4 in an hneh nawn.

Final-ah R. Dengṭhuama Hall khat mipui an pungkhawm a, Electric Veng hian champion lai leh champion nawn tura rinkai Chanmari nen futsal hmuhnawm an chhawp chhuak. Hun pangngaiah Chanamri chungnung hret mah se goal dinhmun chu 2-2 a ni a, extra time-ah Lalrinsanga Khawlhring leh Jonathan Lalrawngbawla ten Electric Veng tana khung belhin 4-2 in hnehna an chang.

Pathian an fak
Electric Veng coach hi Lalhlimpuia (Tat-a) a ni a, Mizo footballer zinga talent nei ṭha zinga mi ni ṭhin Tat-a hi player ni telin hun pawimawhah a tawnhriat a ṭangkai ṭhin hle. Champion team pual hian Electric Veng Branch YMA-in Sakawrpuluiah programme an buatsaih nghal a, Tat-a hian ngaihnawm takin an champion dan a sawi.

Tat-a chuan, "Kan champion theih chhan hi kan thiam vang leh kan theih vang a ni lo. Kan naute hi an thawkrim a, nomawi kan chawi theih nan zingah ni 70 chuang kan practice a, chu chu min hriatsak ve ula kan duh.

"Chu mai pawh chu kan champion chhan a la ni lo a, kan champion chhan ber chu Lalpa engkim ti thei a ni. He kan champion-na hi Lalpa tan kan hlan a, Electric Veng team-ah hian Lalpa ropui ber rawh se," a ti.

Electric Veng champion theih nan hian player bakah coaching staff Lalrinsanga (manager), Duata (asst manager), F. Lalrinsanga (asst coach) leh Eli (physio) te an thawkrim hle.

Thlangtiang FC hun a inher chhuak ta
MFA Division One hnuaia club nghelnghet ber zinga mi Thlangtiang FC chuan champion hmel an hmu ta a, Thawhlehni zana R. Dengṭhuama Hall-a final khelhah Tlangnuam FC 5-2 a hnehin an champion. Thlangtiang FC hian point 45 an hmu tawh a, season thara MFA Futsal League khel turin an dinhmun a ṭha hle.

Futsal League-ah hian team 16 an awm a, tun season-ah team pali Team Gideon Kanan, Whetstone FC Ramthar Veng, Zaia Memorial FC Laipuitlang leh FC Khatla te an relegate. Division One aṭangin team paliin Futsal League an khel dawn a, Season ending tournament khelh a la nih dawn avangin tling tur a la chiang lo.

Inelna vawi khatah hian champion team-in point 30 an hmu a, pahnihna (20), semifinalist (15), quarterfinalist (10) leh pre quarterfinalist (5) ten point an hmu vek. Tun dinhmuna point hmu sang pariatte chu Thlangtiang (45), Goshen FC Sihphir Venghlun (35), FC Muthi (30), Tlangmual FC (25), M&B FC Zuangtui (20), JK FC Zuangtui (20), NSC Samu Hmar FC Nursery Veng (20) leh Armed Veng South (20) te an ni.

Kuriz Collection MFA Futsal
Thlirna Tawi
League Club
Electric Veng FC 4 - 2 Chanmari Zothan Futsal
EVFC : Jonathan Lalrawngbawla 22', 60'; Lalsangkima 23'; Lalrinsanga Khawlhring 52'
CZF : Lalremtluanga 11'; K. Roluahpuia 25'
MoM : Lalrinzuala, Electric Veng FC

Lawmman
Best Player Rs 5,000 VL Rindika, Electric Veng
Fair Play Award Rs 5,000 Chanmari Zothan Futsal Club
Champion Rs 80,000 & Trophy Electric Veng FC
Runners up Rs 50,000 Chanmari Zothan Futsal
Semi-finalists Rs 20,000 Lawmna FC Dinthar
IDBI Capital FC, Thakthing Veng
Quarter finalists Rs 10,000
(FC Thyristor, Ramhlun Venglai, Amawii Bawngkawn FC, Zonuam FC, Saron Veng FC)
Pre-quarter finalists Rs 3,000
(Team Gideon Kanan, Bungkawn FC, LM Futsal Club Durtlang, Ramhlun South FC, FC Khatla, Whetstone FC Ramthar veng, Zaia Memorial Laipuitlang, Chhinga veng FC)

MFA Futsal League aṭangin Team Gideon Kanan, Whetstone FC Ramthar Veng, Zaia Memorial FC Laipuitlang leh FC Khatla te an relegate

Division One
Tlangnuam FC 2 - 5 Thlangtiang FC, Dawrpui
TFC : R. Lalmuanpuia 2'; Zodingngheta 14'
TTFC : Lalremruata 9', 19'; R. Lalmuankima 23'; Lalsawmzela 45', 46'
Best Player Rs 1,000 R. Lalmuankima, Thlangtiang FC
Champion Rs 20,000 & Trophy Thlangtiang FC, Dawrpui
Pahnihna Rs 10,000 Tlangnuam FC

Division One Club aṭangin season tluana point hmu sang club paliten 2022-23 Season-ah MFA Futsal League an khel dawn. May 2022 hian Division One Club tan Season Ending Futsal Tournament buatsaih a ni dawn a, hemi khelh zawh hian season thara MFA Futsal League khel tur club pali dang a chiang ang.

Veteran
Ditea's FC 8 - 1 Kim Kim 77 FC
DFC : Vanlalrova 2', 44'; Joel Lalthangmawia 3', 43'; Hmingthansanga 5', 7', 40'; Lalthanpuia 48'
77FC : F. Lalropuia 35'

Lawmman
Champion Rs 5,000 & Trophy Ditea's FC
Pahnihna Rs 2,500 Kim Kim 77 FC