Warriors leh Bucks an chak lo

NBA playoff chinah chuan result rin lawk thiam a harsa ṭhin. Team ṭha vek an ni tawh a, chak chiang a awm thei lo. Champion lai Milwaukee Bucks leh Golden State Warriors te pawh game 2-ah an chak lo, inenfiah nan an hman a ngai ang.

Nimin zing Western Conference semifinal inkhelah, seeded pathumna Warriors hi Memphis Grizzlies lakah 106-101 in an chak lo, team pahnih hi best of seven series-ah 1-1 in an inhnehtawk mek.

FedEx Forum-a inkhelah Grizzlies tan Ja Morant chuan point 47 a nei, playoff a khelh tawh chinah match khata point a neih hnem ber ṭum a tawng, a ṭhiante zingah point 10 nei tling pathum awm bawkin an chungnung.

Golden State player pawimawh Draymond Green-a'n inkhel tir lamah hliam tenau a tuar, match hnuhnung zawka hnawhchhuah tawk hian khel zui thei leh mah se ni dang a phak tawh lo, a inlan zui thei erawh chanchin lawmawm a ni.

Quarter hmasa berah GSW hi point riat ngawtin an hniam nghal, quarter pahnihna leh pathumnaah insiamṭha mah se, a hnuhnung berah a hniam zawk ni lehin a chak lo zawk an nih a ngai - Pathianni zingah game 3 an khel leh ang.

Nimin zing Eastern Conference inkhelah Bucks an che fuh bik lo, an khingpui Boston Celtics lakah 101-89 in an chak lo. Celtics hian chawlhlawk laiin 65-40 zetin hma an hruai fal thei a, a tawp lamah Bucks ṭang viau mah se kawng an hawnsak tawh lo.

Jaylen Brown (30 points) leh Jayson Tatum (29) te an khel ṭha a; Bucks tana point nei hnem ber Giannis Antetokounmpo (28 points) chungah an leng thei, chak tlang tur erawh chuan an hna a la hautak dawn.

NBA Playoff
Eastern Conference Semifinal
Game 1: Milwaukee Bucks 101 - 89 Boston Celtics
Game 2: Boston Celtics 109 - 86 Milwaukee Bucks
May 8, Pathianni
Game 3: Milwaukee Bucks 01:00 AM Boston Celtics
(Series-ah 1-1 in an inhnehtawk mek)

Western Conference Semifinal
Game 1: Golden State Warriors 117 - 116 Memphis Grizzlies
Game 2: Memphis Grizzlies 106 - 101 Golden State Warriors
May 8, Pathianni
Game 3: Golden State Warriors 06:00 AM Memphis Grizzlies
(Series-ah 1-1 in an inhnehtawk mek)