Premier League khel tur Bournemouth

5th May, 2022

European champion hial vawi hnih lo ni tawh Nottingham Forest chuan season thara Premier League khelhna remchang nei mah se an hun ṭha neih an bawhpelh a, Bournemouth zawkin season tharah Premier League an khel dawn.

Championship aṭangin champion Fulham chu season thara English top flight league khel tur chiang tawh an ni a, automatic-a khel turin hmun ruak pakhat a la awm.

Thawhlehni zan khan pahnihna nih beisei Bournemouth leh Nottingham Forest an intawng ta a, Cherries lam hian 1-0 a hnehna changin, season tharah Premier League an khel dawn.

Tlemte chauh
Team pahnih an intawn hma hian an inkarah point thum chauh a awm a, match hnih chiah khelh tur an nei bawk - Bournemouth tan tlang turin chak a tawk a, Forest tan match tawp ber thlenga beiseina nei turin tlawm a thiang lo bawk.

Bournemouth khelmualah team pahnih an intawng ta ngei a, mualneitu an hlauhawm zawk - second half-ah Dominic Solanke chuan chance duhawm a chhuih goal thei lo a, Philip Billing leh Jaidon Anthony te pawhin Forest goalkeeper Brice Samba an enchhin.

Cherries hi goal hmaah an vannei tawk lo a, team pahnih hi draw result-ah an lungawi mai a ṭul dawn niin a lang hman. Mahse, minute 83-naah Cherries-in tlin ngei an duh tih an pholang a, bench aṭanga luhtir Kieffer Moore chuan chakna goal a khung.

A ngaihnawm
Premier League khelh phak tum team pahnih intawng an ni a, chanchin ngaihnawm tak tak a awm nual - Bournemouth tana goal khungtu Moore khan January khan a club thar hi a zawm ve chauh.

Mahse, hliam vanga a talbuai zui avangin match thum chiah a la khel a, mamawh vanglai takin goal a rawn khung thung - Wales international hian a hun tawn hlimawm hi a theihnghilh tawh lo ang.

Chutihrual chuan Scott Parker lam hmaih a thiang lo - English coach hian season ṭan dawn khan Premier League aṭanga tla Fulham chhuahsanin Cherries a zawm a, top flight-ah a hruai kir nghal. Kum 2020 khan Fulham chu Premier League-ah a lo hruai thleng tawh bawk a, season thum chhungin Premier League-ah vawi hnih a team a hruai thleng tihna a ni.