Djokovic hmachhawn tur Murray

Novak Djokovic-a'n a vawi li nan Madrid Open title lak a tum, last 16-a a hmachhawn tur chu Andy Murray a ni. Player ropui pahnih hi zaninah an intawng dawn, inkhel hmuhnawm a beisei ngam ang.

Thawhlehni zan khan Djokovic hian a match hmasa ber a khel, set hloh loin Gael Monfils chu 6-3, 6-2 in a hneh. Inkhel dangah Murray chuan world number 16 Denis Shapovalov chu 6-1, 3-6, 6-2 in a hneh ve bawk.

Britain tlangval Murray-a'n kumin bikah player langsar hneh a harsat, world number 20 china awm a hneh vawi khatna a ni a, inrintawkna an neih belh ngei ang, number 1 hneh tur erawh chuan vanneih tel a ngai dawn.

World number 78 Murray chuan, "Novak nen hian naupan lai aṭangin kan inhre tawh, profes-sional player kan nih hnuah pawh vawi 36 zet kan inhmachhawn tawh bawk, kan inhrechiang hle. Ani hmachhawn hi engtik lai mahin a awlsam ngai lo," a ti.

Murray hian a tirah chuan clay court season hi hman a tum lo, mahse a thutlukna hmasa a sut. Madrid Open hian duhsak takin wildcard an pe, an duhsak ang ngeiin a tih hlawhtlinsak a ni.

Inkhel dangah Serbia Open champion Andrey Rublev chuan Jack Draper 2-6, 6-4, 7-5 in a hneh. Thla hmasa khan Djokovic hnehin nomawi a chawi a, clay court inelna neih laiah hlawhtlin leh theih a beisei ang.