Thawhthu hlui ziah nawn tum West Ham
Mumang rama an chen laiin West Ham chuan kaitho tu an tawng, anmahni mualah ngei Hammers hian Eintracht Frankfurt 2-1 in an ngam lo. Europa League final lut tur chuan goal khung ngei ngei an mamawh.
Zanin dar 12:30 hian Deutsche Bank Park-ah second leg an khel dawn. German club tan mahni goal venhim a tawk - David Moyes-a'n an intawn hmasaka an tihsual ang kha neih nawn a duh dawn lo, inkhel a hmuhnawm ang.
Semifinal lehlamah pawh German club bawk an inlan dawn. RB Leipzig chuan si khat faia an hneh tawh Rangers an tlawh dawn. Scottish club hian si phur mah se, an match hmasa lama Borussia Dortmund pet chhuak thei an nih avangin zuam sual theih tur an ni.
Thawhthu hlui
Kum 1976 kha a ni a, European Cup Winners’ Cup semifinal-ah West Ham leh Eintracht Frankfurt te hi an intawng. First leg-ah Hammers hi 2-1 in an chak lo, an intawn hmasa a thil thleng ang chiah hi a thleng leh mek.
Second leg-ah erawh English club hian 3-1 in an hneh let thung. West Ham hian an intawn hmasaka thil thleng ang hian zaninah pawh thlen nawn tir leh an tum dawn, Bundesliga club lam erawhin thawnthu tih danglam an tum thung ang.
Premier Lesgue table-a pasarihna tan Bundesliga lama 11-na ni lai hi hneh theih an ni, chutih rualin London Stadium-a an tlarhnung pawp kha an thawm phui lo a nih chuan goal tam zawk phur thei an ni ve bawk.
Goal an mamawh
David Moyes-a'n Premier League-a Arsenal an hmachhawn ṭumin a player ṭhate a chhawr, mahse Europa League a thlir tel a ngaih miau avangin Michail Antonio chu bench lama dah hmasak a ni.
Antonio-a'n bul a ṭan chuan mual sir lamah Jarrod Bowen a tlawh leh thung ang. English forward Bowen hian season duhawm a hmang mek - Gunners laka goal a khung dawn ṭuma Vladimir Coufal ball pek a dawnsawn dan khan a thiam ve tawk tih a lan tir.
England manager Gareth Southgate-a'n a thlitlai zinga mi a ni a, season kal lai inelna hrang hranga goal 16 khung tawh hi Hammers tlarhma lama innghahna a ni dawn - Antonio nen an inkawp fuh chuan an rintlak ang.
Tlarhnung buaina
London Stadium-a an intawn ṭum khan West Ham hian minute khatna lekah goal an chhuah a, second half tir lamah an chhuah bawk. Tlarhnung lamin inenfiah an ngai, league match an khelh hnuhnung berah Craig Dawson, Issa Diop leh Angelo Ogbonna te an inlan thei lo.
Arsenal lakah left-back Aaron Cresswell chu Kurt Zouma nen tlarhnung laia dah a ngai hial, tunah erawh Vladimir Coufal leh Dawson ten training a zawm pangngai tawh; an buaina pakhat chu an chingfel thei tura ngaih a ni.
Tlarhnung thlawp turin Declan Rice an nei, ani hi rintlak viau mah se mahni maia tih vek theih a ni bik lo. English midfielder dinpui turin Gunners an tum ṭuma hahchawlhtir Tomas Soucek a lo kir tawh bawk ang, hnehna chan an tum ngam ang.
Inlan tura beisei
Eintracht Frankfurt:
Trapp; Tuta, Hinteregger, Toure; Knauff, Sow, Rode, Kostic; Lindstrom, Kamada; Borre.
West Ham United:
Areola; Coufal, Dawson, Zouma, Cresswell; Soucek, Rice; Bowen, Lanzini, Fornals; Antonio.
Europa League Semifinal
Second Leg - Zanin Inkhel Tur
Rangers 12:30 AM RB Leipzig
Eintracht Frankfurt 12:30 AM West Ham
First Leg Results
West Ham 1 - 2 Eintracht Frankfurt
WHU: 21'
EIN: Ansgar Knauff 1'; Daichi Kamada 54'
RB Leipzig 1 - 0 Rangers
LEI: Angelino 85'