Europa Conference League Final lut tur zaninah a chiang dawn

European football-a inelna thar Europa Conference League final lut tur chu zaninah chinfelin a awm dawn - inelna hi Europa League hnuai ni mah se, club langsar hlirin semifinal an luh avangin ngaihven a hlawh zawk em ni chu aw, tih mai tur a ni.

ECL semifinal second leg chu zanin dar 12:30-ah khelh a ni dawn a, AS Roma-in Leicester City an mikhual laiin Marseille chuan Feyenoord an hmachhawn dawn bawk.

Jose Mourinho vang ngawt pawhin Roma-in thawm an nei lian a, chutihrual chuan Leicester City hian duhthusamin season hmang lo mah se player ṭha an kawl nual avangin an thawm a na hle.

European football ngainatu zingah Marseille an mikhual lo a, Feyenoord hi Dutch club ṭha zingah sawi hmaih an ni ngai lo bawk - ECL semifinal a hmuhnawm dawn.

Hei le Mourinho
Roma-in an league match hnuhnung berah Bologna chu 0-0 in an inhnehtawkpui a, mahse, he inkhelah hian coach Mourinho-a'n player pawimawh Chris Smalling, Tammy Abraham, Lorenzo Pellegrini leh Nicola Zalewski te chu bul a ṭantir lo.

Portuguese coach chuan, "Leicester City-in an league match-ah player pakua an thlak a, a awlsam lo a ni," tiin player ṭhenkhat a chawlhtir chhan a sawi a, Mourinho hian champion a duh tih a chiang.

Italian club hian hliam vanga an chawlh reng hnuah striker Nicolo Zaniolo, midfielder Bryan Cristante leh full-back Leonardo Spinazzola a chhawr leh thei tawh bawk a, Mourinho-a'n khualmuala an inhnehtawkpui hnu Leicester a hlau lo ang.

Foxes boss Brendan Rodgers-a'n season tharah European football khelh a duh a, a kalkawng neih tawh chhun chu ECL-a champion a ni - chumi tur chuan Roma hneh phawt a ngai a, Jamie Vardy a dam chhoh ṭan avangin thla a muang ang. Mahse, Wilfred Ndidi leh Ryan Bertrand inhliam karah Kiernan Dewsbury-Hall leh James Maddison inlan theih dawn leh dawn loh a la chiang lo.

Marseille beiseina
Kum 2018-a Dutch Cup champion an nih hnuah Feyenoord-in champion nomawi liantham an chawi leh tawh lo a, Dutch club tan tun tluka an record duhawm lo thai bona hun ṭha a awm chuang lo - first leg-ah 3-2 in an chak a, mahse, mahni muala khel an ni thung.

Feyenoord tan Marseille khelmuala an beisei tihlawhtling tur chuan Cyriel Dessers chet ṭhat a ṭul dawn. Kum 27 mi forward hian ECL-ah goal sawm ngawt khung tawhin, top scorer a ni mek a, tun season inelna hrang hranga goal 21 khung tawh Guus Til pawh ven bik ngai a ni.

Marseille-in Ligue 1 lamah Paris Saint-Germain phak lo mah se season thara Champions League khelh beiseina an nei mek a, season duhawm tak an hmang mek - CL an khelh phak a, ECL nomawi an chawi bawk chuan an tan season chhinchhiah tlak a ni dawn.

French club tan kum 35 mi Dimitri Payet a la rintlak reng a, tun season-a match 45-a khelhah goal 16 leh assist vawi thum a nei tawh - ani bakah hian goal 20 khung tawh Arkadiusz Milik pawh ngaihthah a thiang lo.

Europa Conference League Semifinal
First Leg
April 28, Ningani Zan
Leicester City 1 - 1 Roma
LEI: Gianluca Mancini 67' (OG)
ROM: Lorenzo Pellegrini 15'
Feyenoord 3 - 2 Marseille
FEY: Cyriel Dessers 18', 46'; Luis Sinisterra 20'
MAR: Bamba Dieng 28'; Gerson 40'

Second Leg
May 5, Ningani Zan
Marseille 12:30 AM Feyenoord
AS Roma 12:30 AM Leicester City