Atletico an chak leh ta

Coronavirus vanga La Liga chawlh lailawk a nih hnua an match hmasa berah Atletico Madrid chak zo lo mah se Inrinni zan khan Real Valladolid chu 1-0 in an hneh ve leh ta a, 5-0 a Osasuna an lo sawp tawh bawk avangin match hnih chu a zawnin hnehna an chang ve leh ta. 

Wanda Metro-politano-a inkhelah Osasuna laka goal nga khung thei Atletico-in goal an khung dawn lo niin a lang hman a, mahse Diego Simeone-a'n thutlukna a siam fuh.

Argentine coach hian midfielder Marcos Llorente chu minute 73-naah la chhuakin a hmun ruakah forward Vitolo a luhtir a, Spanish forward hian minute 81-naah goal a khung zui.Relegate hlauhthawnawma ding Valladolid-in a chhanletna tur an nei lo a, 1-0 in Atletico an chak.

Covid-19 vanga fixture a chep takah chuan match khatah substitute player panga an lut thei tawh a, Vitolo hi Simeone-a'n Valladolid laka bench aṭanga a luhtir player pangana a ni  a, chakna goal a khung zui. 

Atletico Madrid hi La Liga khelh ṭan leh a nih khan table-ah parukna an ni a, tunah chuan pathumna an ni ta - season thara Champions League khelh ngei an tum ruh hle. 

Champions League khelh tum dang Getafe-in Eibar lakah hnehna an chang zo lo a, 1-1 in an inhnehtawk - minute 30-naa Oghenekaro Etebo hmanga an goal hmahruai khung chu Eibar hian Charles hmangin first half hun pek belhah an chhanglet a, point khata an lungawi a ṭul phah.