Ennawm hmuhnawm puanzar an khar ta Real chu Real, City chu City

Santiago Bernabeu-ah mak tak maia Manchester City an tluk sawp avangin Pep Guardiola hoten Tlumtea thlir taka an thlir Europe lallukhum chu an la nghah rih a ṭul dawn.

Liverpool leh Villarreal ten Champions League semifinal hmuhnawm bik an pho chhuah hnuah Real Madrid leh Man City ten a aia hmuhnawm zawk an chhawp chhuak.

Etihad Stadium-ah City 4-3 in chak mah se Real-in an mual Santiago Bernabeu-ah Nilzai zan khan 3-1 in an hneh let a, a ropui lai chu Carlo Ancelotti hote goal khung hi minute 90 leh a hnu lama lut vek a ni.

Los Blancos hian May 28, Inrinni zanah Liverpool nen Paris-ah nomawi an inchuh dawn. Kum 2018 khan Real hian final-ah Reds hi 3-1 in an hneh a, hemi ṭuma inhliam Mohamed Salah chuan, "Chinfel tur kan nei," tiin Spanish club a tum châk zawk thu a sawi - final pawh a hmuhnawm leh ang.

Dinhmun ṭha City
Pep Guardiola-a'n goal venhim a pawimawh tih hriain Kyle Walker chu damkawr chungin a chhawr lui a, Man City-in goal an mamawh tawh lo chungin Real aiin an goal bawh a na zawk. Chutih rualin Thibaut Courtois tan dan harsa tur khawpin Kevin de Bruyne, Bernardo Silva leh Phil Foden ten an pet lo.

Real-in City tlarhnung an tibuai meuh lo a, Vinicius Jr-a erawhin chance ṭha bik chu goal zawnah a pet lo. Mikhual team dinhmun ṭhat lehzual nan minute 73-naah Riyad Mahrez-a'n ṭha zetin a pet goal. Goal hnihin Pep-a hoten hma an hruai a, substitute Jack Grealish-a'n hun tawp hmain ṭum hnih a khung teuh viau bawk. Real erawhin minute 89-na thlengin goal zawnah ball an pet lo.

Thilmak a thleng
Pep leh Carlo Ancelotti ten substitution an siam ve ve a, Italian manager-in a siam fuh zawk. Real substitute Eduardo Camavinga ball vawrh luh chu Karim Benzema-a'n tlawh letin substitute Rodrygo-a'n goal-ah a chantir a, hei hi minute 90-na a ni.

Real beiseina a nung thar a, injury time minute hnihnaah Dani Carvajal-a cross chu Rodrygo bawkin a tauh lut. Minute hnih chhung lekin Spanish club-in 2-1 in hma an hruai ta zawk a, aggregate-ah 5-5 a nih tak avangin extra time khelh a ṭul.

Extra time-ah Real bawkin bul an ṭan ṭha a, minute thumna lekah Benzema-a'n Ruben Diaz lakah penalty a hlawh chhuak. Etihad Stadium-a penalty hmanga goal khung tawhtu Benzema-a'n City keeper Ederson bumin chakna goal a khung. Real-in tawnhriat an neih ṭhatzia an pholang a, thiam taka hun khawhralin final an thleng.

Engtin zel?
Real Madrid-in UCL nomawi vawi 13 an chawi tawh a, Europe inelna sang berah chuan an danglam ṭhin. Team enkawltu Carlo Ancelotti hian player angin Champions League nomawi vawi hnih a chawi tawh bakah manager angin ṭum thum a chawi tawh a, Real chu Real nge nge an ni.

Man City erawhin Champions League nomawi an la chawi ngai lo a, manager Pep Guardiola-a'n Barcelona a chhuahsan hnuah a chawi leh tawh lo. City chu City an ni. Real laka an chak loh danah City an vanduai a, chutihrualin nomawi duh luat vangin Pep a talbuai. Spanish manager hian player pawimawh Mahrez leh Kevin de Bruyne te a thlak a, rah ṭha a chhuah lo.

Ngaihnawm
• Carlo Ancelotti hi Champions League final-a vawi nga team enkawl thei hmasa ber a ni dawn.
• Real Madrid-in vawi 17 nan European Cup final an khel dawn a, a hmasa 16 aṭangin vawi 13-ah an champion.
• Karim Benzema-a'n tun season knockout stage chinah goal 10 a khung tawh a, 2016-17 season-a Cristiano Ronaldo record a nih rual chiah. French forward hian inelna hrang hrang match 43-ah goal 43 a khung.
• Real Madrid hian European Cup semifinal-ah first leg-a an chak loh ṭuma final an thlen theih hmasak ber a ni. Hemi hma vawi riatah hian semifinal first leg-a an chak loh ṭumin final an thleng zo lo.
• Real Madrid hian an muala UCL match hnuhnung 62-ah match khatah chiah goal khung loh an nei.

Player Inlante
Real Madrid: Courtois; Carvajal, Eder Militao (Jesus Vallejo 115'), Nacho, Mendy; Modrić (Camavinga 75'), Casemiro (Asensio 75'), Kroos (Rodrygo 68'); Valverde, Benzema (Ceballos 104'), Vinícius Júnior (Lucas Vázquez 115')
Man City: Ederson; Walker (Zinchenko 72'), Rúben Dias, Laporte, João Cancelo; Bernardo Silva, Rodri (Sterling 99'), De Bruyne (Gundogan 72'); Mahrez (Fernandinho 85'), Jesus (Grealish 78'), Foden

Beiseina awm tawh loa a lan hnua kan la kal theih hram hramna chu kan club history vang a ni. Inkhel kha a zo ṭep a, hun tawp hmain kan theihna zawng zawng kan la sawr khawm thei hlauh. Final kan thleng hi kan lawm a, Paris-ah team ṭha tak kan hmachhawn dawn. Final hi kan khel tawh ṭhin a, football hmuhnawm tak kan pho chhuak ang. - Carlo Ancelotti, Real Madrid manager

Kan chak lo a, tla mai tur kan ni. Mahse maw, thilmak a thleng. Real Madrid kawr nen hi chuan a tawp thleng rakin kan bei ang. Tla thei dinhmuna kan awm hnu khan ka goal khung khan beiseina min siam a ni.
- Rodrygo, Real Madrid forward

Kan thleng teuh takzet a, a tawpah erawh kan thleng zo ta lo. First half-ah khan kan khel ṭha lo chungin hrem kan ni lo a, hun harsa kan tawh phah lo. Second half-ah kan theihna angin kan khel thei a, mah se kan ṭhat dan ber erawh a ni lo. Football hi chu sawi lawk theih a ni lo a, kan pawm mai a ṭul. Kan hun tawn pal dam tur chuan hun kan mamawh ang. - Pep Guardiola, Man City manager

CHAMPIONS LEAGUE SEMIFINAL
First Leg
April 26, Thawhlehni Zan
Manchester City 4 - 3 Real Madrid
MAC: Kevin de Bruyne 2'; Gabriel Jesus 11', Phil Foden 53'; Bernardo Silva 74'
REA: Karim Benzema 33', 82' (P); Vinícius Júnior 55'
April 27, Nilaini Zan
Liverpool 2 - 0 Villarreal
LIV: Pervis Estupinan 53'; Sadio Mane 55'

Second Leg
May 3, Thawhlehni Zan
Villarreal 2 - 3 Liverpool
VIL: Boulaye Dia 3'; Francis Coquelin 41'
LIV: Fabinho 62'; Luis Diaz 67'; Sadio Mane 74'
*Agg-ah Liverpol 5-2 in an chak
May 5, Nilaini Zan
Real Madrid 3 - 1 (a.e.t) Manchester City
RMA : Rodrygo 90', 90+1'; Karim Benzema 95' (P)
MNC : Riyad Mahrez 73'
*Agg-ah Real Madrid 6-5 in an chak