Zanin aṭangin PVL Chhinga Veng hmaah Durtlang North

Tualchhung volleyball inelna lian - Zothan Autoworks Pro Volleyball League 2022 chu zanin aṭangin khelh a ni dawn, season hmasa final-a intawng Chhinga Veng Spikers leh Durtlang North ten inelna bul an ṭan ang.

Tournament hi R. Dengthuama Indoor Stadium, Mualpuiah khelh tur niin LPS-ah live a ni ang. Season hmasa khan Chhinga Vengin inkhel inhnehtawk takah hnehna an chang a, zanin inkhel pawh a hmuhnawm leh nghal dawn.

Chhinga Veng champion puitu, coach Jesse Lalpianpuia'n kum thum kal ta aiin an squad a chhah zawk tih a sawi. Kum 2019 final an khelh ṭuma inkhel bul ṭantu paruk zinga panga a la kawl, player dang pali a neih belh bakah Karnataka state team player Sujith Acharya an lalut bawk a ni.

Spikers tan captain Lallianmawia Pachuau leh C. Lalbiakhlua te chu innghahna an ni dawn, an lak thar Sujith Acharya hian tawnhriat a nei ṭha a, eng ang taka ṭha nge a nih chu Mizo mipuiten kan lo teh ang.

Durtlang North pawh champion tum ngam zinga mi an ni leh dawn. Captain Zomuanpuia, Lalbiakmuana, Ramtharnghaka, Fabian Lallung-hnema leh Vanlalṭanpuia te an nei, volleyball ngainatute zingah an hming inzawh nawn a ngai lo.

Haryana aṭangin Sagar Malik an nei bawk. Ani hi tualchhung player-te nen an ṭangkhawm thiam a nih chuan chakpui tham a ni ang, tournament ṭan zan aṭangin match boruak a sang nghal viau a nih pawhin a mak lo ang.

Kumin PVL-ah hian mipa team panga - Chhinga Veng Spikers (2019 champion, champion lai), Durtlang North (2019 pahnihna), Hunthar (2017 leh 2018 champion), Tuichangral (2019 semifinal lut) leh Thutak Nunpuitu Team (2016 pahnihna) an inel dawn.

Hmeichhe lamah team pali - Durtlang (2019 champion, champion lai), Bungkawn (2019 pahnihna), Bethlehem Vengthlang leh Kanan an inlan dawn. Anni hian May 10, Thawhlehni aṭangin inelna an ṭan thung ang.