Sir Jim Ratcliffe-a'n Chelsea lei a tum ruh

UK sorkarin Chelsea neitu Roman Abramovich a hrek hnuah Blues-in neitu thar a la nei thei lo a, Russian sumdawng hausa hian lei theih tura a club a chhawpchhuahna rei tawh mah se leitu an la awm lo.

Chelsea hian leitu tur a hmuh zawh loh vang erawh a ni lo a, London club neih duh an awm nual avangin Blues hralh chungchang buaipuitu Raine Group lamin thlitfim an la harsat a ni zawk.

Tun hnaia Chelsea lei tumtu langsar Sir Jim Ratcliffe pawh Raine hian an lo hnar a, mahse, British sumdawng hausa tawntaw hian London club hi lei ngei a duh.

Chemical group Ineos neitu Sir Jim Ratcliffe chuan, "Kan beidawng lo," tiin Blues hi lei ngei a tum a, Premier League club lei tur hian pound tluklehdingawn 4.25 sen a inhuam!

An hnawl chhan
Raine chuan Chelsea lei tur hian American sumdawng hausa Todd Boehly leh a thawhpuite an duhsak bera sawi a ni a, Major League Baseball club LA Dodgers neitu Boehly leh a thawhpuite hian pound tluklehdingawn 2.5 chu Chelsea lei nan hian an phal.

Sir Jim Ratcliffe-a thehchhuah phal zat £4.25tld an phak lo hle. French Ligue 1 club Nice neitu Ratcliffe hian club leina ngawr ngawr atan £2.5tld a thehchhuah tur thu a sawi a, £1.75tld chu kum sawm chhunga Blues tana a hman tur a nih thu a sawi bawk.

Heti taka sum sen a inhuam chunga a phal tlem zawkten duhsak an hlawh zawk hi mak tih a awl mai thei - a chhan ber erawh Sir Ratcliffe a chet tlai vang a ni a, Raine hian an hun tiam chhunga a lan loh avangin an lo hnawl nghal.

Raine hian March 18 thleng kha Chelsea lei duhtu tan hun an hawng a, Sir Ratcliffe-te hian kar hmasa Zirtawpni khan Blues lei an tumna hi Raine hnenah an thehlut ve chiah.

Tlai chhan
Ratcliffe chuan, "Kan ram tana club hlu em em lei tum kan ni a, chutiang a nih avang chuan kan hun leh sum tam tak sen kan inhuam a ngai tlat a ni," tiin Blues lei tura ngaihtuahna an sen rei thu a sawi.

Chemical group Ineos neitu Ratcliffe chuan, "Keini chuan Blues hi kan lei a nih chuan rei tak awm kan duh. Chutiang tur chuan mawhphurhna lak tur tam tak a awm a, kan rilru zawng zawng kan pe thei dawn em, tih ngaihtuah turin hun kan mamawh tam a ni," a ti.

Ratcliffe chuan sawi zawmin, "A tawpah chuan Blues tan hian kan inpeihah kan ngai a, tlawmsan mai pawh kan tum lo," a ti a, Chelsea chu sumdawnna rilru ngawr ngawr pua lei tum a nih loh thu a sawi.

Ineos CEO Ratcliffe hausakna hi dollar tluklehdingawn 16.3 vel niin Forbes chuan a tarlang a, media ṭhenkhat chuan dollar tluklehdingawn 28.2 a nei tling niin an tarlang thung.

British mi ngei aw!
Kum 69 mi Ratcliffe-a'n Chelsea a chan ngei theih nan a thluak a vawrh a, "British mi ngeiin British thil hlu a lei tur chu ngaihtuah uluk bik tur a ni," a ti a, an ram tana thil ṭha tih tum a nih thu a sawi.

Ratcliffe hian a duhtawk mai lo - British mi ni lo, Premier League club neitute chuan PL club hlutna an pawh lo niin a sawi a, "Chelsea tana hmathlir thui tak nei pawh ni lo kuta London club a tlu lut tur hi tam tak chuan an ngai ngam lo a ni," a ti!

Chelsea lei tura dinhmun ṭha bera sawi Boehly hian dollar tluklehdingawn 4.5 hausakna a nei nia sawi a ni a, baseball club Dodgers, US hmeichhe basketball team Los Angeles Sparks leh NBA club lar LA Lakers-ah te pawh share a nei.

Boehly hian Swiss mi hausa tawntaw Hansjorg Wyss, American PR executive Barbara Charone, British sumdawng hausa Jonathan Goldstein leh British journalist Daniel Finkelstein te chu Chelsea lei tum hian a thawhpui.

Sumdawnna?
Boehly leh a ṭhiante suma thawhpuitu langsar chu Clearlake Capital an ni a, anni hi investment firm niin, Chelsea lei tumna hi a hlawhtling a nih ngat chuan Clearlake Capital hi share nei ngah ber tur an ni ang.

Ratcliffe chuan, "Todd Boehly hi ka hmelhriat a ni lo a, a ṭhiante pawh ka hre lo. Ka hriat erawh, venture capital & private equity khawvelah hian hun ka lo hmang ve nual tawh.

"Chutianga kan ngaihtuah ber chu kan sum sen tur leh kan hmuh let dan tur a ni a, kum nga ruahmanna a ni tlangpui bawk - Todd leh a ṭhiante pawh, suma puitu ber tur hi venture capital & private equity khawvela inhmang an ni tlat.

"USA-ah chuan anni ang hian sports club an lei an phal miah lo ang, mahse, UK-ah chuan a theih tlat si," a ti a, Todd leh a thawhpuite chu mahni hlawk nana club lei tum an nih thu a sawi.

United fan!
Ratcliffe hian Chelsea fan-te tana hriat nuam lo tur a sawi zeuh a, chu chu Manchester United fan a nih thu a ni. Team Sky cycling franchise leh Nice neitu ni bawk Ratcliffe chuan Red Devils lei a tum loh chhan chu, "An zawrh loh vang," tiin a sawi!

British sumdawng hausa chuan, "Chelsea-ah in ka nei a, hun rei tak he hmunah hian ka awm tawh. Season ticket hi rei tak chhung chu kum tin ka lei ziah a, Chelsea-a hmun nei sumdawnna ka nei bawk," a ti a, London club chu a tan thil thar a ni lo.

Ratcliffe chuan sawi zawmin, "A football ang zawng tawpa thlir pawhin, football hi khawvela infiamna lar ber a ni a, British league hi khawvela league ṭha ber a ni a, Chelsea hi chu league-ah chuan club ṭha ber pawl an ni bawk," a ti.

A zahzum avanga vantlang hmuha inpholang khat taka sawi Ratcliffe chuan, "London-ah rei tak ka awm lai khan United inkhel en a har a, Chelsea inkhel en turin ka kal fo ṭhin. Club pahnih ka ṭan a ni ber mai," a ti a, Blues fan a nih tho thu a sawi.

Sumdawnna aiah tuina
Abramovich-a'n June 2003-a Chelsea a lei khan club vantlang ve mai an ni a, mahse, Russian sumdawng hausain ren miah loa a sum a hman meuh chuan European football-a club ṭha ber pawl an ni tawh.

Ratcliffe chuan, "Chelsea lei ka tum chhan hi sum lama hlawk kan duh vang a ni lo. Hma hun thui tak thlir chungin Blues-ah hian sum hman kan duh.

"He club hi ṭha taka enkawlin, European football-a club ṭha ber pawlah kan chhuah thei ang em? Chu chu kan tum ber chu a ni," a ti a, London club an lei chuan sum ren an tum loh thu a sawi.

Ratcliffe hian Ligue 1 club Nice bakah Swiss Super League club FC Lausanne-Sport a nei bawk a, football khawvelah a mikhual lo.

Ratcliffe ruahmanna & thusawi
• London khawpui ang maia ropuia Chelsea siam a duh.
• Suma hlawkna um vanga Chelsea lei tum a ni lo. A company Ineos chuan sum ringawt ngaihtuah se, an sudawnna chemical aṭangin sum hmuh tur tam tak a awm.
• Stamford Bridge-ah mipui tam zawk leng thei se a duh a,world class stadium-ah siam a duh bawk. Stadium hming thlak a ni lo ang.
• Chelsea hmeichhe team leh academy tan sum tam tak sen a ni ang.
• Kum 2018-a Chelsea lei an tum hmasak khan Blues-in an hlutna anga an sawi chu an tan pawm a harsa.
• Chelsea a lei thei a nih chuan France striker Kylian Mbappe lei chu a duhthusam a ni a, mahse, Real Madrid-ah a kal ngei a ring thung!
• Blues manager ni lai Thomas Tuchel chu sawiselna tur a nei lo.