Maradona jersey hralhna a turu

'Hand of God' leh Diego Maradona a inzawm tlat a, khawvelin a theihnghilh tawh loh tur goal leh a khungtu an ni. 1986 World Cup-a Argentina captain Maradona-a'n England a hmachhawn ṭuma a kawr hak chu lilam niin, Rs 68,32,83,140.42 (£7.1m) zeta hralh a ni.

Sotheby (lilamna) hotupa Brahm Wachter chuan, "A nihna takah chuan pound maktaduai 4-6 inkara hralh kan beisei, football jersey kan hralh tawh zinga man tam ber a ni ta hial," tiin a sawi. Infiamna huangah chuan, thil hlui leh hriatreng tur an hralh tawh zinga man tam ber a ni hial.

Lilamna aṭanga jersey an hralh to ber chu baseball player Babe Ruth-a ta a ni ṭhin. Kum 2019 khan New York Yankees legend jersey hi pound maktaduai 4.4 in an hralh, record hmasa hi a rawn khum chiang hle.

Kum 2019 tho hian Olympic manifesto, 1892 daih tawh ami lehkha a ziak chu pound maktaduai 7-in an hralh bawk a, hei hi infiamna thil bika record a ni. Hei pawh hi Maradona hian a rawn khum leh bawk.

Jersey hi England midfielder hlui Steve Hodge-a'n kum 36 chhung ngawt a lo kawl ṭha tawh. England leh Argentina inkhelh ṭum khan, quarterfinal match an khelh hnuah Maradona hi jersey hi a lo inthlengpui a ni.

Argentina legend hi November, 2020 khan a thi, a thih hnu hian a thil hlui tam takin ngaihven a hlawh, chung zingah chuan jersey hi mi ngaihven hlawh zual zinga mi a ni phak, lei tuma tha thawh pawh an tam.

Nikum December thla khan Hodge chuan, "Maradona jersey ka kawl avangin ka kawngkhar chu engtik lai pawhin mi hrang hrangin an rawn kik a ni ber mai, hetiang em ema min chuhpui hi inzah lohna niah ka ngai, a dik loin hralh tur pawh a ni lo," tiin a lo sawi tawh.

Hodge hian ama mimal chanchin a ziahna lehkhabu pawh 'Maradona kawr neitu' tiin thupui a phuah hial. Kum 20 chhung zet chu National Football Museum, Manchester-ah jersey hi a lo dah tawh a ni.