Hnehna nen Nadal a lo kir

Rafael Nadal chuan a nakruh hliam a dam tawh tih hmuh theihin a puang - Madrid Open khelh laiah inlanin, a hliam dam hnua a match hmasa berah Miomir Kecmanovic a hneh a, third round a inhlangkai.

Nilaini zan inkhelah Nadal hian Serbian player lakah hian 6-1, 7-6 (7-4) in hnehna a chang, Grand Slam vawi 21 champion tawh hian a beisei aia hmain tournament a khelh leh theih thu a sawi chhuak.

March thla khan Indian Wells-ah Nadal hi a inlan, inelna neih laiin a nakruh a hliam. Clay court season tir lamah a inlan thei lo a, inelna lian French Open khel tur erawh chuan inbuatsaihna ṭha tak a nei hman dawn.

Madrid Open vawi nga champion tawh Nadal chuan, "A nihna takah chuan tournament khelh hma hian duhthusam a ṭhain inbuatsaihna ka nei hman lo, match hmasa bera ka khelh dan hian min tilawm takzet.

"Taksa leh rilru hi 100% in a inpeih a nih loh chuan result ṭha neih a harsa ṭhin. Tunah hian hmasawn ngaihna lai ka la ngah, tluk leh din fawma kal ka la nih avangin fimkhur pawh a la ngai hle," tiin a sawi.

Spanish star Nadal hian a match lehpekah chuan David Goffin a hmachhawn ang. Inkhel dangah Belgium star hian Botic van de Zandschulp chu 6-4, 6-2 in a lo hneh ve bawk a, a service vawi khat chauh hlohin a khingpui service vawi li a chhuhsak thung.

Inkhel dangah, champion lai Alexander Zverev pawh a chak. Zverev hian US Open champion hlui Marin Cilic chu 4-6, 6-4, 6-4 in a hneh. German tlangval hian American player Sebastian Korda a hmachhawn leh dawn.

Zverev chuan, "Marin hi player ropui a ni a, a rilru a paukhauh hle bawk. Set hmasa ber ka hloh hnuah phei kha chuan ka tan kawng a harsa hle, mahse vannei takin a chak zawkah ka ṭang," tiin a sawi a, season hmasa anga champion leh a beisei ang.

Player langsar zinga mi Stefanos Tsitsipas pawhin 6-3, 6-4 in Lucas Pouille a hneh. Monte Carlo champion hi clay court-a inkhel a ni a, champion tura rinkai zinga mi a ni phak. Match dangah seeded pariatna Felix Auger-Aliassime pawhin Cristian Garin 6-3, 6-0 in a sawp.