Suns leh Heat an chak nawn

Phoenix Suns leh Miami Heat ten conference final lut turin dinhmun an sawhnghet. Match hmasa bera hnehna an chan hnuah, nimin zing khan game 2-ah an chak leh ve ve a, best-of-seven playoff series la turin kawng dik an zawh.

Western Conference semifinal inkhelah Suns hian, player tawnhriat nei ṭha Chris Paul-a point 28 neih hmangin Dallas Mavericks chu 129-109 in an hneh a, series-ah 2-0 in hma an hruai. Inrinni tukah game 3 an khel leh ang.

Suns chakpuitu Paul chuan, "Kan khelmualah a zawnin hnehna kan chang, hei hi result ṭha tak a ni. Kan nihna ang takin kan khel chhuak thei a, kan khelh hmabakah erawh inthlahdah a remchang chuang lo," tiin a ṭawng fimkhur hle.

Game 3 leh 4 chu Mavericks khelmualah an khel ve thung dawn, match hmasa pahnihah chak lo mah se beisei an la nei thei ang. Game 2 quarter thumna bikah pawh point 32-26 in an sang a, a pumpuiah 60-58 in an sang hman.

Luka Doncic-a'n point 35 zet nei mah se thlawptu a nei ṭha tawk lo, an player pawimawh leh ṭha hi tun aia hman ṭangkai zual dan an ngaihtuah a ngai a, thlawpna ṭha a hmuh bawk chuan Suns tan pawh awlsam taka paltlang tur an ni bik lo ang.

Eastern Conference semifinal lamah Heat chuan 119-103 in Philadelphia 76ers an hneh. Bam Adebayo (23 points) leh Jimmy Butler (22) te an che ṭha a, point 34 neitu Tyrese Maxey khel ṭha mah se 76ers a chakpui zo lo.

76ers hian an khelmuala an khelh hunah chuan Joel Embiid a inlan theih tawh an beisei. Mahse, coach Doc Rivers erawh a la ṭawng kimkhur hle, "Hmabak a la nei, a lo kir hun ka sawi chiang thei lo," tiin a sawi thung a ni.

NBA Playoff
Western Conference Semifinal
Game 1: Phoenix Suns 121 - 114 Dallas Mavericks
Game 2: Phoenix Suns 129 - 109 Dallas Mavericks
(Suns hian series-ah 2-0 in hma an hruai)

May 7, Inrinni
Game 3: Dallas Mavericks 07:00 AM Phoenix Suns
Eastern Conference Semifinal
Game 1: Miami Heat 106 - 92 Philadelphia 76ers
Game 2: Miami Heat 119 - 103 Philadelphia 76ers
(Series-ah Miami hian 2-0 in hma an hruai)

May 7, Inrinni
Game 3: Philadelphia 76ers 04:30 AM Miami Heat

Note: Inelna hi best of seven series hmanga khelh a ni, tlang turin vawi li chak a ngai.